Сотеби дуудлага худалдааны газрынхан түүхэндээ анх удаа хиймэл оюун ухаантай хуманойд роботын зурсан уран зургийг энэ сарын сүүлээр үнэ хаялцуулах гэж байна. “A.I. God. Portrait of Alan Turing (2024)” буюу “Хиймэл оюун ухааны Бурхан Алан Тюрингийн хөрөг” нэртэй уг хөрөг нь Их Британид уран зургийн галлерей ажиллуулдаг Айдан Меллерийн зохион бүтээсэн Ай-Да Роботын бүтээл аж.

А.Меллер CNN-ийн сэтгүүлчид тайлбарлахдаа Ай-Дагийн бүтээл нийгэм хийгээд технологийн харилцааг тодотгон харуулж, урлагт нийгмийн өөрчлөлтийг тусган харуулдаг тогтсон байдлыг эвдэнэ. Өнгөрсөн үеийн бүхий л аугаа уран зураачдыг эргэн харвал нийгэмд гарч буй өөрчлөлт, шилжилтийг онцлон дүрсэлж, уран бүтээлээрээ ил тод харуулдаг. Харин одоо хүний сэтгэлгээний бүтээлийг машин ч гэсэн урлагийн бүтээл болгож чаддагийг харуулах гэсэн юм хэмээн ярьсан байна.

Англи гаралтай математикч, нууц бичээс тайлагч Алан Тюрингийн хөргийг бүтээсэн учир нь хүн төрөлхтний түүхэнд анх удаа хиймэл оюун ухаан, компьютерийн шинжлэх ухааны үндсийг тавьсан гэж түүхчид өндрөөр үнэлдэг юм.

Энэ сарын 31-нд болох дуудлага худалдаа зохион байгуулагчдын таамаглаж буйгаар Ай-Дагийн зурсан алдарт эрдэмтний хөрөг 120,000-180,000 долларын үнэд хүрч магадгүй гэнэ. Мөн тэд дуудлага худалдааны арилжааг криптовалютаар хийхийг зөвшөөрөх юм байна.