Холливуудын алдарт жүжигчин, 60 настай Николас Кейж энэ сарын 21-нд Ньюпорт Бийч кино наадамд оролцож, 31 настай эхнэр Рико Шибатагийн хамт улаан хивсэн дээгүүр алхжээ. Тэдний инээмсэглэсэн зургийг Дейли Мэйл сонингийнхон онлайн хувилбартаа нийтэлсэн нь олон нийтийн сүлжээгээр тарж, сөрөг агуулгатай шүүмжлэл хөврөх болсон байна. Учир нь, нэгэн шүтэн бишрэгч “Эхнэр нь ихдээ л 18-тай юм шиг харагдаж байна. Николас Кейж хүүхэд шиг харагддаг эмэгтэйчүүдэд дуртай бололтой. Үүнд тохирсон нэг нэр байдаг шүү дээ” гэсэн нь олны анхааралд өртөж, онлайн даяар шүүмж, маргаан, хэлэлцүүлэг  өрнүүлжээ. Дээрх шүтэн бишрэгчийн хэлсэн үгийн цаад утга нь Н.Кейжийг бага насны хүүхэд сонирхдог “педофиль” гэх санааг илтгэх бөгөөд хэдэн арван мянган хүн түүнийг гаж донтон гэж адлах болов. Хэдийгээр дуулиан дэгдэж, таагүй уур амьсгал бүрдсэн ч алдарт жүжигчин ямар нэгэн хариу тайлбар хийгээгүй л байна.

Сонирхуулахад, насны хэт хол зөрүүтэй хос 2020 онд Японд танилцаж, дараа жил нь гэрлэж, 2022 онд нэг охинтой болсон билээ. Мөн түүнтэй адил эвгүй байдалд орсон хэд, хэдэн алдартан байдгаас Чарли Чаплин, Леонардо ДиКаприо нарыг дурдаж болох юм. Учир нь, тэд бүгд олон насаар дүү эмэгтэйчүүдтэй нэр холбогддогоороо олны дунд эргэлзээ төрүүлдэг.