АНУ-ын агаар, сансрын агентлаг НАСА 2022 онд дэлхийг солир мөргөх аюулаас сэргийлэх туршилт хийж, манай гарагаас 12.6 сая км-ийн зайд явсан Диморфос солирыг пуужингаар мөргөж, чиглэлийг нь өөрчилж байсан. Тэгвэл Европын сансрын агентлаг хиймлээр үүсгэсэн уг ослын газрыг шалгахаар Хера хөлгийг илгээлээ. Сансар судлаачдын тооцоолсноор эндээс илгээсэн хөлөг 2026 оны аравдугаар сард солирт хүрч түүнийг мөргөх үеэр үүссэн тогооны тойрог, гүнийг хэмжих даалгавартай юм байна. Энэхүү ослын газар шалгах төслийн зорилго нь ирээдүйд хүн төрөлхтөн дэлхийг чиглэн ирж буй солирын хор хөнөөлөөс сэргийлж, хүн төрөлхтнийг аварч чаддаг болох эсэхийг тодорхойлох юм. Ослын газрыг шалгахаар Хера хөлгийг 11 ширхэг тусгай төхөөрөмжөөр тоноглосноос гадна гутлын хайрцагны хэмжээтэй хоёр ширхэг хиймэл дагуулыг СпейсИксийн Фалкон 9 пуужингаар задгай сансар руу хөөргөж, 76 минутийн дараа Хера хөлөг цааш хийх аялалдаа амжилттай гарсан байна. Энэхүү даалгавар нь НАСА-гийн DART Буюу Хос солирын чиглэл өөрчлөх туршилтын дараагийн шат болж байгаагаараа онцлог бөгөөд даалгавараа амжилттай биелүүлбэл хүн төрөлхтөн цаашид солиртой мөргөлдөж, сөнөх аюулаас өөрсдийгөө бүрэн хамгаалах боломжтой болох юм. DART хөтөлбөрийн тухайд нэг биш хоёр ширхэг солирын системийг онилж, чиглэл өөрчлөх туршилт явуулсан ба дээр дурдагдсан Диморфос нь Дидимос хэмээх арай том солирын дагуул сар маягийн сансрын биет аж.