Загалмайлсан эцэг киноны Майкль Карлеоны дүрээрээ манай үзэгчдийн хамгийн сайн танил болсон Холливуудын алдарт жүжигчин Аль Пачино 2020 онд корона вирус дэгдэхэд халдвар авч үхэх дөхсөн талаар Нью-Йорк Тайс сонин, Пийпль сэтгүүлд өгсөн ярилцлагадаа дурсчээ. Оскарын шагналт жүжигчин маань вирусийн халдвар авч биеийн байдал муудан зүрхний цохилт нь үл мэдэгдэхүйц удаашран үхлийн үүдэнд очоод эргэн ирсэн гэв. Аль Пачино Нью-Йорк Таймст өгсөн ярилцлагадаа “Ковид-19-ийн халдвар авснаас хойш маш хүнд байдалд орсон. Тасралтгүй халуурч, шингэний дутагдалд орсон. Ингээд л үхдэг юм байж гэж бодогдоод хойд насны талаар эрэгцүүлж, төсөөлж байлаа. Сууж байгаа мөртлөө би байхгүй ч юм шиг. Хөөх, үхлийн өмнө хүний дурсамж ч толгойд орж ирдэггүй байх нь ээ гэж бодогдоод хов хоосон оргиж байв” хэмээн ярьсан байна. Өөрөөр хэлбэл тэрээр өөрийгөө үхээд сэхсэн хэмээн ярьжээ. Түргэн тусламжийнхан ирж яаралтай арга хэмжээ авсанаар Аль Пачино амьд үлдсэн бөгөөд тухайн үед ирсэн зургаан сувилагч, хоёр эмч нэг л өвөрмөц, сансраас ирсэн хүмүүс шиг харагдаж байлаа гэж тэр хуучилжээ. Харин Пийпль сэтгүүлд өгсөн ярилцлагадаа өдгөө 84 настай жүжигчин ухаан ороод нэлээд будилсан. Эргэн тойрноо ажиглаж, би чинь яачихаа вэ? гэж бодогдсон. Тэнд байсан хүмүүс намайг үхсэн гэж бодсон. Би ч өөрийгөө үхсэн гэж бодож байгаа. Үгүй ч байж мэднэ. Ямартай ч амьд үлдсэн.” гэж зэргээр ярьжээ. Алдарт жүжигчний ийн эрлэгийн үүдэнд очоод ирсэн түүхийг хэн ч мэддэггүй бөгөөд өнөөдөр/2024.10.08/ нээлтээ хийх “Сонни хүү” намтарчилсан номонд нь өөр олон сонирхолтой зүйлсийн талаар оруулжээ.