Их Британид эрдэмтдийн гайхашралыг барсан нэгэн явдал болжээ. Халуун оронд амьдардаг хоёр дэнгийн эрвээхэй жуулчны цүнхэнд “туулайчилж”, Өмнөд Америкаас өмнөд Уэйлс хүрчээ. Юу нь тийм гайхмаар гэвэл эрдэмтэд уг хоёр дэнгийн эрвээхэйг судалж үзээд цоо шинэ төрлийнх болохыг нь олж мэдсэнд байгаа юм. Экологич Дейзи Кадет ээж Ашлейнхээ хамтаар гурван сарын өмнө Гаяана улс руу аялаад ирсэн бөгөөд цонхны тавцан дээр суух тунгалаг далавчит дэнгийн эрвээхэйг олж хараад мэл гайхаж, зургийг нь онлайнд оруулжээ. Их Британийн Байгалийн түүхийн музейн мэргэжилтнүүд Д.Кадеттай холбогдож, судалж үзээд шинжлэх ухаанд огт бүртгэгдэж байгаагүй төрлийнх болохыг нь тогтоосон байна. Эрдэмтэд дэнгийн эрвээхэйнүүд авгалдай байхдаа ямар нэгэн тохиолдлоор Дейзигийн цүнхэнд орж, 4,500 бээр туулан дэлхийн бөмбөрцөгийн нөгөө талд хүрсэн гэх таамаглал дэвшүүлжээ.