БНХАУ-ын Эргийн хамгаалалтынхан ОХУ-ын талтай хамтарсан эргүүл хийж, түүхэндээ анх удаа Хойд мөсөн далайн бүсэд хүрсэн гэж мэдээлснээр Бээжингийн хөл хөрсөн газраа тэлэх бодлого хэрэгжиж, хойд болон өмнөд туйлд хүрэх зорилго нэг алхмаар урагшилсан ахиц гарлаа хэмээн олон улсын хэвлэлүүд мэдээлж байна. АНУ-ын Эргийн хамгаалалтын удирдлагуудын хийсэ мэдэгдлээс үзэхэд Хятад, Оросын дөрвөн усан онгоц Берингийн тэнгист үзэгдсэн нь Хятадын тал өөрсдийн хэмжээнд дэлхийн бөмбөрцөгийн хамгийн хойд хэсэгт хүрсэн явдал боллоо хэмээн дээрх мэдээллийг баталгаажуулав. Хятадын Эргийн хамгаалалтынхан өнгөрсөн лхагва гарагт албан ёсны сошиал хуудсандаа хийсэн мэдэгдэлдээ “Хоёр орны эргийн хамгаалалтын хамтарсан эргүүлийн далайц хүрээгээ тэлж, шинэ тутам нутагт даалгавар гүйцэтгэх чадамжийн туршилт амжилттай боллоо” хэмээн онцолсон байна. Хэдийгээр БНХАУ-ын талаас яг хаа хүрсэн байрлалын талаар дэлгэрэнгүй мэдээлэл цацаагүй ч хэвлэлүүдээр тархсан Хятадын Эргийн хамгаалалтын онгоцон дээр “Намынхаа төлөө Хойд мөсөн далайд ч үнэнчээр зүтгэхийн төлөө бүх сэтгэл зүрхээ дайчилна” гэх зэрэг уриа үгс харагджээ. ОХУ-ын Засгийн газар эргүүлийн талаар албан ёсны мэдэгдэл хийгээгүй ч тус улсын ТАСС агентлаг Хятадын талаас гаргасан мэдээлэлд үндэслэн уг үйл явдал хэд хоногийн өмнө болсон гэж мэдээллээ. Хэдийгээр энэ нь БНХАУ-ын хувьд шинэ ололт мэт боловч АНУ-ын талаас тун түгшингүй буйгаа илэрхийлэв. Тус улсын Эргийн хамгаалалтын Адмирал Меган Дийн “Энэ үйл явдал нь манай стратегийн өрсөлдөгчдийн Хойд мөсөн далай дахь сонирхол огцом нэмэгдсэнийг тод харууллаа. Ингэснээр БНХАУ ОХУ-тай хамтран эмзэг хүрээлэн буй орчинтой Хойд мөсөн далайн бүсэд стратегийн үйл ажиллагаа явуулж, талууд аюулгүй байдал, эдийн засгийн харилцаагаа улам зузаатгаж байгаа нь манай улсын хувьд анхаарууштай явдал юм” гэжээ. Учир нь, АНУ-ын зүгээс Хойд туйл орчмын байгалийн баялагийг дангаар эзэмших сонирхол асар өндөр тул өөрсдийн ашиг сонирхол зөрчигдөхөөс эмээж байдаг юм.