Ургамал судлаачид 1980-аад онд Иудейн цөлийн нэгэн агуйгаас олдсон мянган жилийн настай үрийг тарьж, эрт цагт мөхсөн модны төрлийг дахин ургуулсан байна. Төсөлд оролцсон судлаачдын зүтгэлийн ачаар өнөө цагт бүрэн устсан гэж үздэг ч Библийн судар болоод эртний бичвэрүүдэд дурдсан эмчилгээний тос гарган авдаг модыг ургуулж чаджээ. Йерусалемийн хойд нутагт орших Вади Эл Маккукын доод хэсэг дэх археологийн малтлагын талбараас олдсон үр тун сайн хадгалагдсан ч ямар төрлийн модных болохыг тогтоож чадалгүй өдийг хүрээд байв. Доктор Сара Саллоны ахалсан Хаддасса их сургуулийн Анагаахын төвийн Луйз Борикын Байгалийн эм зүйн судалгааны төвийн багийнхан үрийн төрөл зүйлийг тодорхойлохын тулд арваад жилийн өмнө хөрсөнд суулгасан бөгөөд өнөөдөр үр дүнг нь үзээд байгаа юм. С.Саллон тэргүүтэй эрдэмтэд уг үрийг өнөөгийн Йорданы нутагт багтах Йорданы хавцалт хөндий дэх Сөнөсөн тэнгисийн умард хэсгийн Гилиадад эрт цагт элбэг ургадаг байсан “цори” хэмээх анагаах увидастай мод гэх таамгийг дэвшүүлээд байсан билээ. Энэхүү цори гэх мод нь Библийн сударт гардаг. Аливаа өвчин эмгэгийг анагаах увидастай гэж маш тодорхой бичиж үлджээ.