Роботын технологи бол хүн төрөлхтний хөгжил дэвшлийн нэг ололтоос гадна хамгийн анхаарал татсан, сонирхолтой салбар. Уг салбарынхан роботыг хүнтэй илүү адил болгохын төлөө олон жилийн турш тасралтгүй судалгаа, шинжилгээ хийсээр байдаг. Тэгвэл Японы эрдэмтэд уг зорилгод нэг алхмаар ойртон очсон байна. Учир нь Токиогийн их сургуулийн судлаачид хүний арьсны эсийг лабораторийн орчинд нүүрний хэлбэртэй ургуулсан нь амжилт олжээ. Бүр тодруулбал тэд ургуулсан хүний нүүрний хэлбэртэй арьсанд шөрмөстэй адил холбоос залгаж, нэг талаас нь татахад яг л хүн шиг инээмсэглэж байсан аж. Ингэснээр “Инээмсэглэдэг арьс” гэж нэрлэсэн энэхүү шинэ бүтээл нь роботын хөгжилд томоохон үсрэлт авч ирээд зогсохгүй гоо сайхны салбарт ч шинэ эргэлт хийнэ гэж эрдэмтэд тайлбарлаж байна. Токиогийн их сургуулийн ахлах судлаач Шожи Такеүчи ийнхүү холбоос эд ашиглаж, “амьд” арьсыг анх удаа хөдөлгөөнд оруулж чадсандаа тун их олзуурхаж байна гэлээ.