Бэлгийн боолчлол, хөдөлмөрийн мөлжлөг, хүчирхийлэл гээд олон хэрэгт шалгагдаж, дэлхий даяар хэний ч санаанд багтамгүй шуугиан дэгдээгээд байгаа алдарт реппер, продьюсер Диддигийн тухай баримтат киног Нетфликс компани бүтээж буйгаа зарлалаа. Цувралаар үзэгчдэд хүрэх уг баримтат киноны продюсераар реппер 50Цент ажиллаж байгаа нь олны анхаарлыг татлаа. Учир нь, тэрбээр Диддигийн зохион байгуулдаг үдэшлэгт нэг ч удаа очиж байгаагүй бөгөөд аль эртнээс олон нийтэд анхааруулж, хэлж, сэрэмжлүүлж байсан гэдгээрээ сүүлийн үед сайшаал хүртээд байгаа билээ. Яг одоогийн байдлаар уран бүтээлийн ажил нь эхэлсэн цуврал баримтат киноны найруулагчаар Александриа Степльтон ажиллаж байгаа юм байна. 50Цент, А.Степльтон нар Варьети сэтгүүлд ярихдаа “Энэ баримтат кино бол энгийн нэг гоё ганганг харуулсан клип биш. Энэ бол хэдэн арван дамжсан удаан өгүүлэх түүх юм” гэжээ.