Японы эрдэмтэд зүүд уншдаг машин бүтээжээ. Ингэснээр та шөнө, өдрийн аль нэгэн цагт унтаж байхдаа зүүдэлсэн зүүдээ бичиж, бичлэг болгон хадгалж, хожим нь кино, клип шиг үзэж, өвөрмөц мөртлөө хачин жигтэй зүүдний ертөнцөөр аялж болно гэсэн үг юм байна. Киотогийн их сургуулийн мэдрэл судлаач доктор Юкиясу Камитанигийн ахалсан судлаач эрдэмтдийн баг тархины үйл ажиллагааг шинжилдэг сканнер буюу MRI машиныг дахин шинэчилж, энэ гайхалтай зүүд мөрөөдөл мэт төсөөллийг бодит болгох туршилтандаа нэг шат ахиц гаргасан гэв. Энэхүү машин нь тархин доторх визуаль зураглалыг тайлж, дахин байгуулах технологи бөгөөд ялангуяа зүүд уншигч төхөөрөмж гэж ойлгож болох юм. Доктор Ю.Камитани энэ бүтээл дээрээ олон жил ажилласны эцэст ийнхүү зүүд бичих, дахин тоглуулах боломж нээснээрээ гайхагдаж буй юм. Зүүд бичигч машин нь цусны урсгалаар тархины үйл ажиллагааны өөрчлөлтийг хэмждэг fMRI буюу Функциональ соронзон резонанст томографийн төхөөрөмж ашигладаг. Хүн зүүдлэх үед мэдрэлийн үйл ажиллагаа идэвхжиж, тархины тогтсон хэсэгт тодорхой загварчлалаар гэрэл асдаг байна. Ялангуяа, нүдний хараа хариуцсан хэсэг идэвхжиж, төрөл бүрийн зураглал бий болдог юм. Чухам энэ үед fMRI машин эдгээр өөрчлөлтийг бичиж аваад дэвшилтэт хиймэл оюун ухааны алгоритмын тусламжтайгаар визуаль дүрслэлийг тайлж унших зарчмаар ажилладаг аж. Ингээд зүүд уншигч машинаар цуглуулсан тархины өгөгдлийг дахин боловсруулж, дүрсэнд шилжүүлснээр таны зүүд яг л кино мэт өмнө чинь амилах гэнэ.