АНУ-ын Ерөнхийлөгчийн сонгуулийн сунгаа эрчимжиж, нэр дэвшигч Дональд Трамп, Камала Харрис нар мягмар гарагт анхны мэтгэлцээнээ хийж, АВС Ньюзийнхэн дамжуулсан. Өрсөлдөгчид сонгогчдын дунд бараг ижил тэнцүү нэр хүндтэй яваа учир энэ мэтгэлцээн тун чухал үүрэгтэй байлаа. Ажиглагчид болон хэвлэлийнхэн Ардчилсан Намын нэр дэвшигч, дэд ерөнхийлөгч Камала Харрисыг мэтгэлцээнд илүүрхсэн гэж дүгнэжээ. Мэтгэлцээнээс гадна тэрбумтан Элон Маск, дуучин Тейлор Свифт нар дэлхий дахины анхаарлыг татсан хэрүүл болсон юм. Алдарт дуучин Т.Свифт К.Харрисыг дэмжиж буйгаа инстаграм хуудсаараа илэрхийлсэн нь тэрбумтан залуугийн дургүйцлийг төрүүлжээ. Тодруулбал, Т.Свифт постныхоо төгсгөл “Childless Cat Lady” буюу Хүүхэдгүй, мууртай эмэгтэй гэж бичсэнийг Э.Маск түүн рүү давшлахдаа өлгөж авсан байна. Элон Маск Х хуудсандаа дургүйцлээ илэрхийлэхдээ “Чи яллаа. Тэгвэл би чамайг хүүхэдтэй болгож өгөөд муурыг чинь насаараа хамгаалж явъя” гэж жиргэжээ.

“Хүүхэдгүй, мууртай эмэгтэй” тухайд тайлбарлахад Д.Трампын Дэд Ерөнхийлөгчөөрөө сонгосон сенатч Ж.Д.Венс хүүхэдгүй эмэгтэйчүүдийг доромжилсон утгаар ашигласан хэллэг юм. Ерөнхий утга нь хүүхэд төрүүлэлгүй оронд нь муур тэжээж насыг бардаг эмэгтэйчүүдийг хэлжээ.