Зөвлөлт Холбоот Улс, Бүгд Найрамдах Монгол Ард Улсын цэргийн хамтарсан хүч Халх голд Японы түрэмгийлэгчдийн эсрэг тэмцэж, ялалт байгуулсан энэ түүхэн өдрийн 85 жилийн ойн баярт зориулсан арга хэмжээнүүдийг өнөөдөр Улаанбаатар хотын Сүхбаатарын талбайд зохион байгуулж байна. Халх голын байлдааны ялалтын 85 жилийн ойд бэлтгэх, зохион байгуулах хороо, Монгол Улсын Батлан хамгаалах яамны санаачилгаар ялалт байгуулсан хоёр орны армийн дуу бүжгийн эрдмийн чуулга хамтарсан тоглолтоор иргэд та бүхэнд бэлэг барихаар урилга хүргүүлж байна. Байлдааны гавьяаны улаан тугийн болон Байлдааны гавьяаны одонт Цэргийн дуу бүжгийн эрдмийн чуулга, Байлдааны гавьяаны улаан тугийн хошой одонт Александровын нэрэмжит Оросын армийн дуу бүжгийн эрдмийн чуулгын хамтран энэхүү хүндэтгэлийн тоглолт 2024 оны есдүгээр сарын 03-ны 19 цаг 30 минутанд болно. Ялалтад уриалж, тулаанд зоригжуулсан, сэтгэлд хоногшиж, зүрхэнд уянгалсан дуу, хуур, хөгжмийн цогц нэгдэл болсон уг тоглолтын дараа 21 цаг 30 минутаас “Үдшийн цэнгүүн” үргэлжлэх юм байна.