Ливи улсад өнгөрсөн оны есдүгээр сард гарсан гамшигт буруутай 12 хүнд холбогдох хэргийн шүүх хурал дуусаж, тохирох шийтгэлийг оноосон байна. Тухайн үед Дерна хотод далан нурж, гамшигт нөхцөл үүссэн бөгөөд 4000 гаруй хүн амиа алдсан харамсалтай хэрэг гарсан юм. Ливийн Хууль зүйн яамнаас гаргасан мэдээллээр бүхэл хотыг усанд автуулж, хүн амьдрах нөхцөлгүй болгоход хүргэсэн гамшигт нөхцөл үүсэхэд буруутай гэх 12 хүнд 9-27 жилийн ял оноосон байна. Ял сонссон орон нутгийн албаны хүмүүсийг усны эх үүсвэрийн менежментийг буруу явуулснаас далан нурж, гамшгийн үеэр аврах, нүүлгэн шилжүүлэх ажиллагааг зохион байгуулахад хариуцлага алдсан хэмээн буруутгажээ. Түүнээс илүүтэйгээр ажилдаа хариуцлагагүй, хойрго хандсан нь бусдын амь насанд урьдаас төлөвлөн халдсан зүйл ангид багтсанаас гадна төсвийн мөнгийг үр ашиггүй зарцуулсан гэж Ливийн Дээд шүүх үзэн дээрх шийтгэлийг оноосон гэж Ройтерс мэдээлэв.