Умард Солонгосын Гадаад хэргийн дэд сайдын айлчлал барууны хэвлэлүүдийн анхаарлыг татав. Энэ айлчлал эхлэхээс хоёр хоногийн өмнөөс Япон болон Өмнөд Солонгосын хэвлэлүүд, мөн Ройтерс болон барууны хэд, хэдэн агентлагууд уг айлчлалыг онцолж тодотгосон юм. Геополитикийн асар ээдрээтэй харилцаатайн дээр, Солонгосын хойгийн нөхцөл байдал хурцдаж байгаа энэ цаг үед гаднын хэвлэлүүд Умард Солонгосын Гадаад хэргийн дэд сайдын айлчлалыг дипломат агуулгаараа чухал гэдгийг онцолж байв.

Энэ сарын 10-ны өдөр Умард Солонгосын Гадаад хэргийн дэд сайд Пак Мён Хо Монгол Улсад айлчилж Монгол Улсын Гадаад харилцааны сайдтай уулзсан. Энэхүү айлчлалаар “...хоёр улсын уламжлалт найрсаг харилцаа, хамтын ажиллагааг бэхжүүлэн хөгжүүлэхэд хувь нэмэр оруулна гэдэгт итгэж буйгаа илэрхийлэв” гэж Гадаад харилцааны яамны албан ёсны цахим хуудаст нийтэлжээ. Уулзалтын гол агуулга нь Солонгосын хойгийн нөхцөл байдлыг энхийн замаар хэлэлцдэг “Улаанбаатарын яриа хэлэлцээ”-нээс гадна, “Дэлхийн эмэгтэйчүүдийн чуулга уулзалт”-ын талаар байсныг албан мэдээллээс харж болохоор байна.

Өмнөд Солонгос болон барууны хэвлэлүүд мэдээлэхдээ Умардын талын “Родонг Синмун” сонины мэдээллийг эш татаад Монгол-Умард Солонгосын дипломат харилцааны ойрын хугацааны түүхийг онцолжээ. Ингэхдээ 2019 онд айлчилснаас хойш буюу бүр илүү тодотговол цар тахлын хатуу хязгаарлалтаас хойш тус улсад хийж буй анхны айлчлал гэж мэдээлсэн байна. Түүхэн харилцаатай байдаг энэ хоёр улсын харилцаа нь цаашид анхаарууштай асуудал гэдгийг ч зарим хэвлэлд онцолсон юм.

Айлчлалын өмнөх хэдэн долоо хоногийн хугацаанд Солонгосын хойгийн асуудал хурцадмал хэвээр байж Умардын тал дайнд бэлдэх үүрэг өгснийг, Япон тэнгист харвах пуужингийн туршилтыг нэмэгдүүлэхээр болсныг ч дэлхийн хэвлэлүүд онцолж байлаа. Геополитикийн хувьд ээдрээтэй энэ цаг үед Умард Солонгосын Гадаад хэргийн дэд сайд Монгол Улсад айлчилсан гэдгийг АНУ-тай холбоотон болох Япон, Өмнөд Солонгосын хэвлэлүүд онцолсон нь энэ.

Гадаад бодлого, геополитик талаасаа гаднынхан ингэж онцолжээ. Тэгвэл гадаад бодлого талаасаа онцлох зүйл гэвэл өнгөрсөн нэгдүгээр сард Монгол Улсаас БНАСАУ-д суух элчин сайд итгэмжлэх жуух бичиг өргөн барьж, алба гүйцэтгэхээр болсон юм. Түүнчлэн энэхүү айлчлалын үеэр Умард Солонгосын Гадаад хэргийн дэд сайд Монгол Улсын Ерөнхийлөгчид бараалхахдаа өнгөрсөн онд хоёр улс дипломат харилцаа тогтоосны 75 жилийн ой, Умард Солонгосын удирдагч Монгол Улсад айлчилсны 35 жилийн ой тохиосон нь хоёр улсын харилцаанд тэмдэглүүштэй үйл явдал гэдгийг онцлон тэмдэглэжээ.