Унгар улсын Засгийн газар Олон улсын эрүүгийн шүүхээс гарах гэж байгаагаа зарлалаа. Израилийн Ерөнхий сайд Беньямин Нетаньяху Унгар улсад албан ёсны айлчлал хийж байх үеэр буюу өчигдөр Унгарын Засгийн газрын өндөр албан тушаалтан ийнхүү мэдэгдсэн байна.

Унгарын Ерөнхий сайд 2024 оны 11 дүгээр сард Израилийн Ерөнхий сайдыг эх орондоо урьсан юм. Яг энэ цаг үетэй давхцан Олон улсын эрүүгийн шүүхээс Израилийн Ерөнхий сайдыг хүн төрөлхтний эсрэг гэмт хэрэг үйлдсэн гэж үзэн баривчлах шийдвэр гаргасан. Тухайн үед нь Унгарын Ерөнхий сайд энэ шийдвэрийг “антисемитизм” гэж эрс буруушаасан юм.

Унгар улс нь 125 гишүүнтэй Олон улсын эрүүгийн шүүхийг үүсгэн байгуулсан гишүүн орон юм. Хэрэв гарах шийдвэр баталгаажвал тус шүүхээс гарч буй Европын холбооны анхны улс болно. Израилийн Ерөнхий сайд айлчлалынхаа үеэр “Авлигад идэгдсэн байгууллагын эсрэг зоригтой бөгөөд зарчимтай шийдвэр гаргаж байгаа” гэж сайшаасан байна.

Хэдийгээр Унгарын Засгийн газар ийм шийдвэр гаргасан ч албан ёсоор гарах хүртэл хуулийн хувьд урт хугацаа шаардагдана гэдгийг хуульчид хэлж байгаа юм. Харин барууны улс орнууд Унгарын мэдэгдлийг ихээхэн дургүйцсэн өнгө аясаар хүлээн авсан байна.