НҮБ-ын Монгол Улсын хөгжлийн төлөв байдлын шинжилгээ тайланд дурдсанаар Монгол Улсад ялгарч буй нүүрсхүчлийн хий дэлхийн дунджаас 15 дахин их, нэг хүнд ногдох хүлэмжийн хийн ялгарал 21 тонн байгааг дурджээ. Хамгийн гол нөлөөлж буй хүчин зүйл нь газар ашиглалт гэж дүгнэсэн байна. Учир нь газар ашиглалт, аж үйлдвэрийн бодлого, уул уурхайн бодлого хангалтгүй байгаа нь хүлэмжийн ялгаралд тодорхой нөлөөлжээ. Монгол Улсын ялгаруулж буй нийт хүлэмжийн хийн 44 хувь нь газар ашиглалттай холбоотой байна.

Монгол Улс сүүлийн 70 жилийн дэлхийн дунджаас бараг гурав дахин өндөр эрчтэй дулаарч байгаа төдийгүй уур амьсгалын өөрчлөлтөд хамгийн их өртөж буй улсуудын нэгт тооцогдож буйг НҮБ-ын Монгол Улсын хөгжлийн төлөв байдлын шинжилгээ тайланд онцолсон байна.

Уур амьсгалын өөрчлөлттэй тэмцэх, байгаль орчноо хамгаалах нөлөөллийн ажилд залуучуудын хувь нэмэр чухал тул байгаль орчны боловсрол олгох хөтөлбөрийг сургуулийн хөтөлбөрт тусгах шаардлагатай гэж үзэж байна.

Мөн уур амьсгалтай холбоотой санхүүгийн эрсдэлийг сайтар судалж, үр дүнтэй удирдах нь зүйтэй. Уур амьсгалын өөрчлөлттэй тэмцэх арга хэмжээг хэрэгжүүлэх татварын болон санхүүгийн шинэлэг эх үүсвэр бий болгох ажлыг эрчимжүүлэх шаардлагатай зэрэг зөвлөмжийг тайланд дурджээ.