БНХАУ-ын Сансрын агентлагийн нууцын зэрэглэлд багтдаг Шенлун сансрын онгоц дэлхийн гадаргаас 600 км-ийн өндөрт үл мэдэгдэх нисдэг биет илрүүлсэн талаар мэдээлэл гарлаа. Хятадын сансрын мэргэжилтнүүдээс бусад эрдэмтэн тэрхүү биетийг судалж үзсэн боловч чухам юу блохыг нь тодорхойлж чадаагүй учир бага оврын хиймэл дагуул эсвэл орбитоос гарсан тоног төхөөрөмжийн хэлтэрхий байх гэж таамаг дэвшүүлжээ. АНУ-ын Сансрын хүчнийхэн өнгөрсөн оны арванхоёрдугаар сарын 24-нд Жиучуаны пуужин хөөргөх төвөөс хөөрсөн уг сансрын онгоцыг цаг, минут алдалгүй ажиглаж байгаа ч Шенлун сансрын онгоцны талаар тодорхой мэдээлэлтэй болж амжаагүй гэв. Харин өнөөх нууцлаг биетийн тухайд АНУ-ын талаас хөөргөсөн, орбитод урт хугацааны аялал хийх чадвартай Боинг Х-37В сансрын хөлөг байх магадлалтай хэмээн тайлбарлалаа. Хятадын нууцын зэрэглэлтэй Шенлун сансрын онгоц нь анх 2020 онд хөөрсөн боловч орбитод ердөө хоёрхон хоноод газардсан ч 2022 онд хоёр дахиа хөөргөж, орбитод 276 хоног аялжээ.