Монголбанкны Мөнгөний бодлогын хороо хуралдаж, хэрэглээний зээлийн бүтцийн өөрчлөлттэй холбоотой зохицуулалтад өөрчлөлт оруулжээ. Шинэ зохицуулалтаар зээлээ төлөхөд хүндрэлтэй болсон иргэн банкнаас дахин мөнгө зээлэхгүйгээр одоо байгаа зээлийн  хугацаагаа  48 хүртэлх сараар  сунгуулж, сарын төлбөрөө багасгах боломжтой болжээ.
 
Жишээлбэл, 10 сая төгрөгийн 30 сарын хугацаатай зээлтэй иргэн зээлээ 48 сар болговол сарын төлбөр нь ойролцоогоор 411 мянгаас 288 мянган төгрөг болж, 30 орчим хувиар буурна. Гэхдээ хугацаа уртсахын хэрээр нийт төлөх хүү нэмэгдэнэ. Дээрх жишээнд нийт хүүгийн төлбөр 1.5 сая орчим төгрөгөөр өснө. Тиймээс энэ боломж нь бодит хүндрэлд орсон, зээлээ төлөхөд бэрхшээлтэй болсон иргэдэд зориулагдсан аж.
 
Өмнө нь банк зээлийн хугацааг сунгах гэхэд өр, орлогын харьцааны хязгаарлалт болон зээлийн хугацааны дээд хязгаар саад болж болох байв.Тиймээс шинэ зохицуулалтаар банк иргэний зээлийн бүтцэд өөрчлөлт оруулж болно. Бүтцийн өөрчлөлт хийхэд өр, орлогын  хязгаарлалтыг заавал мөрдөхгүй. Ингэж зээлийн хугацаагаа сунгуулахдаа  банк шинээр мөнгө нэмж зээлдүүлэхгүй,зээлийн өрийг тэглэхгүй байх нөхцөл тавьж байгаа ажээ.
 

• Бүтцийн өөрчлөлт автоматаар хийгдэхгүй. Хүндрэлд орсон иргэд зээл авсан банкандаа хандана.
• Банк таны санхүүгийн нөхцөл байдлыг холбогдох журмын дагуу үнэлж, бүтцийн өөрчлөлт хийх эсэхийг шийднэ.
• Шаардлагатай бол бүтцийг нэгээс олон удаа өөрчилж болох ч зээлийн нийт хугацаа 48 сараас хэтрэхгүй.
• Шийдвэр Монголбанкны Ерөнхийлөгчийн тушаал батлагдсан огнооны өдрөөс эхлэн хэрэгжинэ.
• Баталгаажвал: Бүтэц өөрчлөхөд банкнууд зээлийн хүүг нэмэхгүй, нэмэлт шимтгэл авахгүй.

 
Монголбанкны мэдээлснээр 2026 оны есдүгээр сарын байдлаар банкны салбараас зээлийн үлдэгдэлтэй нийт 1.2 сая зээлдэгч байгаагийн 66.4 хувь нь өр, орлогын харьцаа 45 хувиас дээш байна. Мөн өр, орлогын харьцааны хязгаарлалтад хамаарах хэрэглээний зээлийн чанаргүйдлийн хувь 2026 оны есдүгээр сард 9.1 хувьд хүрч, өмнөх оны мөн үеэс 2.7 нэгж хувиар өсжээ.