Европын албаны хүмүүсийн зүгээс ОХУ  тэдний улс орнуудад дайны аюул учруулж байна хэмээн мэдэгдэж буйг Ерөнхийлөгч Владимир Путин “улс төрийн шизофрени” гэж нэрлэжээ. Тэрбээр энэ тухай пүрэв гарагт Москва хотын Большой театрт болсон Театрын ажилтнуудын холбооны их хуралд оролцсоныхоо дараа сэтгүүлч Павел Зарубинтай ярилцах үеэрээ тодотгосон байна. Путин Москва Европтой хийх дайнд ямар нэгэн байдлаар бэлтгэж байна гэх удаа дараагийн мэдэгдлүүдийг эрс няцааж, үүнийг Европ тивд өрнөж буй “Оросын эсрэг кампанит ажлын” нэг хэсэг гэж үзэж байгаагаа илэрхийлсэн байна.

“Тэд одоо бүр “Оросын аюул занал”-ын талаар байнга ярьж, Оростой хийх дайны бэлтгэлийн тухай хэлэлцэхэд хүрээд байна. Миний бодлоор бол энэ нь нэг төрлийн улс төрийн шизофрени (сэтгэцийн эмгэг)-тэй дүйцэхүйц зүйл юм. Гэхдээ энэ байдал арилна гэж найдаж байна” хэмээжээ.“Украины мөргөлдөөн нь Оросыг тулааны талбарт ялах боломжгүй гэдгийг тодорхой харууллаа. Тэд Оростой эв найртай амьдрах нь дээр гэдгийг, өөрөөр хэлбэл энэ зам нь тэдний өөрсдийн ард түмний ашиг сонирхолд үнэхээр нийцэх зам гэдгийг ойлгоно гэж найдаж байна.

Хэрэв та өнөөдөр Европт өрнөж буй улс төрийн үйл явцыг ажиглавал, Европын ард түмэн Оростой дайтах хүсэлгүй байгаа нь тодорхой харагдана” гэж Ерөнхийлөгч ярьжээ. Түүнчлэн  ОХУ ч гэсэн Украинтай дайтахыг хүсэхгүй байгааг Путин онцлоод, “2014 онд Киев өөрөө дайныг сонгосон. Тухайлбал, “Майдан”-ы төрийн эргэлтийг эсэргүүцсэн Донбассын (тухайн үед Украины бүрэлдэхүүнд байсан) ард иргэдийн эсрэг Киев дайн хийх замыг сонгосон бөгөөд уг мөргөлдөөнийг зохицуулахад зуучлах гэсэн Москвагийн олон удаагийн оролдлогыг ч Украин улс хүлээж аваагүй. Хэрэв Украины одоогийн удирдлага тулалдахыг хүсэж байгаа бол тулалдаг л дээ.Гэхдээ тэд яагаад бусад хүмүүс зардлыг нь дааж, зэвсгээр хангахыг хүлээгээд байгаа юм бэ. Тэдэнд өөрсдийн гэсэн үндэслэл байгаа байх, магадгүй энэ нь өмнө нь өгсөн тусламжийн амлалтуудтай холбоотой биз” гэжээ.

Орос Украины мөргөлдөөнийг дипломат замаар шийдвэрлэхэд бэлэн хэвээр байгааг Путин мэдэгдэж, Москвагийн зүгээс Вашингтон, Киевтэй гурван талт хэлэлцээг сэргээх хүсэлтэй байгаагаа дахин тодотгосон байна. "Эдгээр хэлэлцээний зорилго нь энхийн хэлэлцээрүүд, тодруулбал зөвхөн түр зуур гал зогсоох бус, харин бат бөх, урт хугацааны хэлэлцээрүүд байгуулагдсаны дараа Украин болон Орос улсын аюулгүй байдлыг хэрхэн хангахыг хэлэлцэхэд оршино" гэж Ерөнхийлөгч хэлээд, уг хэлэлцүүлэгт Европын аюулгүй байдлын илүү өргөн хүрээтэй тогтолцоог хамруулах ёстойг нэмж дурдлаа. Өнгөрсөн лхагва гарагт Санкт-Петербург хотноо Путин АНУ-ын тусгай элч Стив Виткоффтой уулзсаны дараа Москва гурван талт хэлэлцээг сэргээхэд бэлэн байгаагаа зарлав. Үүний дараа Кремлийн туслах Юрий Ушаков хэлэхдээ, хэлэлцээний дараагийн үе шат 11-р сарын дундуур Абу Даби хотод болж магадгүй гэж мэдэгдлээ.