Энэ жил “Apple-ийн шүтэн бишрэгчид маш сайн үзүүлэлттэй “iPhone 17 Pro”-гоосоо удахгүй гарах “iPhone 18 Pro” руу шилжих эсэхээ шийдэхдээ эргэлзэж магадгүй юм. Учир нь “Apple” ирэх долоо хоногт болох "Surprise and shine" арга хэмжээнийхээ үеэр цоо шинэ “iPhone Ultra” загварыг танилцуулах хүлээлт өндөр байна. Ингэснээр хэрэглэгчид өмнө нь туршигдаж, баталгаажсан загвараа үргэлжлүүлэн ашиглах уу, эсвэл бүтээмжийг нэмэгдүүлж, эвхэгддэг шилдэг утаснуудын санал болгодог олон давуу талыг олгох шинэ хэлбэр хийцтэй загвар руу шилжих үү гэсэн сонголтын өмнө ирэх болно. 

Үнэндээ “Apple”-ийн зүгээс хийхээр төлөвлөж буй камерын сайжруулалт нь таныг “iPhone 17 Pro”-гоос “iPhone 18 Pro” руу шилжихэд түлхэц болох хамгийн гол шалтгаан байж болох юм. “iPhone 18 Pro”-г танилцуулах арга хэмжээний тов тодорхой болсон ч эдгээр утас худалдаанд гарах болоогүй байна. 

Анх харахад “iPhone 18 Pro” болон “iPhone 17 Pro” загваруудыг ялгахад бэрх байж магадгүй юм. Хоёр утас хоёулаа хэрэглэхэд эвтэйхэн байдал болон дэлгэцийн талбайн хэмжээг төгс тэнцвэржүүлсэн 6.3 инчийн хэмжээтэй байх аж. “iPhone 17 Pro” нь хөнгөн цагаан цул их бие болон арын хэсгийн "Ceramic Shield 2" хамгаалалтаараа олны анхаарлыг татаж байсан бол “iPhone 18 Pro” ч мөн энэхүү нэгдмэл загварын хэв маягийг хадгалах хүлээлттэй байна. Загварын хувьд хамгийн мэдэгдэхүйц өөрчлөлт урд хэсэгт гарч болзошгүй аж. “Apple” компани “iPhone 18 Pro”-д зориулан "Dynamic Island"-ыг илүү жижиг болгохоор ажиллаж байгаа бөгөөд ингэснээр дэлгэцийн ашиглах боломжтой талбайг бага зэрэг нэмэгдүүлэх юм.

Түүнчлэн, “iPhone 18 Pro”-ийн дэлгэц нь шинэ "LTPO+" технологийн ачаар илүү үр ашигтай болж сайжрах сурагтай. Энэ нь “iPhone 17 Pro”-д ашиглагдсан стандарт "LTPO XDR OLED" дэлгэцтэй харьцуулахад гадаа орчинд илүү тод харагдах байдал болон эрчим хүчний хэмнэлтийг хангах ажээ.

“iPhone 18 Pro” (болон 18 Pro Max) загварууд нь энэ жилийн цувралд багтах сурагтай байгаа "Dark Cherry" (хар интоорын өнгө) болон "Light Blue" (цайвар цэнхэр) сонголтуудтай байх магадлалтай. Бусад өнгөний сонголтод мөнгөлөг болон хар саарал өнгөнүүд багтах нь бараг тодорхой юм. Түүнчлэн эрчим хүчний хэмнэлт сайжирч, батерейны хүчин чадал ч 17 Pro загварын 4,252 мАц-аас 18 Pro загварт ойролцоогоор 4,288 мАц болж бага зэрэг нэмэгдсэн тул батерейны ажиллах хугацаа мэдэгдэхүйц уртсах боломжтой. “iPhone 18 Pro” нь ажиллах хугацаа болон ерөнхий гүйцэтгэлийн аль алиных нь хувьд өмнөх загвараасаа илүү сайн байх аж. 

Хэрэв та аль хэдийн iPhone 17 Pro загварыг ашиглаж байгаа бол одоогийн төхөөрөмжийнхөө хүчин чадлыг харгалзан үзэхэд шинэ загвар руу шилжих шаардлагатай эсэхийг шийдэхэд хэцүү байж магадгүй юм. “Apple”-ийн 2025 оны энэхүү бүтээгдэхүүн нь гайхалтай 6.3 инчийн дэлгэц, 48 мегапикселийн гурвалсан камерын систем, мөн "Apple Intelligence"-ийг дэмжих 12 ГБ шуурхай санах ой (RAM)-той. Энэ бол олон жилийн турш дээд зэрэглэлийн гүйцэтгэлээ хадгалан ажиллах чадвартай, маш хүчирхэг төхөөрөмж юм. Гэсэн хэдий ч, хэрэв та ухаалаг утсаа маш идэвхтэй ашигладаг эсвэл мэргэжлийн түвшинд зураг авдаг хүн бол “iPhone 18 Pro”-д багтах магадлалтай хувьсах диафрагм (variable aperture), өндөр үр ашигтай 2 нм-ийн A20 Pro чип, мөн илүү хүчин чадалтай батерей зэрэг нь таны анхаарлыг татах нь дамжиггүй. Гэхдээ хувьсах диафрагм болон илүү хол зайд томруулж авах боломж (zoom) зэрэг нь зөвхөн “iPhone 18 Pro Max” загварт л байх магадлалтайг анхаараарай.

https://www.yahoo.com/tech/ai/apple-intelligence/articles/iphone-18-pro-vs-iphone-073000390.html