Ажил олгогчид Z үеийнхнийг ажлын байранд бэлэн биш гэж үздэг. "Priceline"-ий толгой компани болох "Booking Holdings"-ийн гүйцэтгэх захирал Гленн Фогел залуу ажилтнуудыг оффисын соёл, холбогдох хэм хэмжээний талаар чиглүүлэх хэрэгтэй хэмээжээ. "Whole Foods"-ийн гүйцэтгэх захирал асан Жон Макки залуучуудын талаар тэд ажиллах хүсэлгүй мэт санагддаг гэж хэлсэн удаатай. 2024 онд "Intelligent.com"-оос бизнесийн салбарын 1000 орчим удирдагчийн дунд явуулсан санал асуулгаар компаниудын 75 хувь нь саяхан ажилд авсан төгсөгчдийн зарим эсвэл бүгдийнх нь ажлын гүйцэтгэлд сэтгэл дундуур байдгаа илэрхийлж байжээ. Мөн "Hult International Business School"-ийн ивээн тэтгэсэн, хүний ​​нөөцийн 800 удирдагчийг хамруулсан өөр нэг судалгаагаар тэдний 37 хувь нь шинэ төгсөгч ажилд авахаас илүүтэй робот эсвэл хиймэл оюун ухаанаар (AI) ажил хийлгэхийг илүүд үзнэ гэж хариулсан бол 30 хувь нь тухайн ажлын байрыг эзэнгүй орхихыг илүүд үзнэ гэжээ. X үеийн боссууд миллениалуудыг зөөлөн, дураараа үздэг байсан бол бумерууд X үеийнхнийг хайхрамжгүй залхуу хүмүүс гэж үздэг байсан. Харин чимээгүй үеийнхэн бумеруудыг нийгмийн ёс суртахуун, хэм хэмжээг зөрчихөөр шийдсэн хиппи хүмүүс гэж үздэг байв. "Сургуулиас ажил хөдөлмөрт шилжих үйл явц өөр байдаг тул насны бүлэг бүр дээр ийм гомдол гардаг" талаар Пенсильванийн их сургуулийн профессор Питер Каппелли онцолжээ. Цаг хугацаа өнгөрөхөд энэхүү шилжилтийн үе жигдэрч, залуучууд эцэг эхийнхээ нэгэн адил ажил хөдөлмөрт дасан зохицдог. Гэвч COVID-19-ийн улмаас "Z үе"-ийнхэн өмнөх үеийнхнээсээ илүү их цагийг дэлгэцийн өмнө өнгөрүүлж, болзоонд явах нь хүртэл бага байсан бөгөөд нийгмийн харилцаанд төдийлөн идэвхтэй бус байжээ.