Германи бавар үндэстний хувсаар жигдэрсэн 150 идэрмэг залуу эр өчигдөр нэгэн өвөрмөц тэмцээнээр өрсөлдөж, аваргаа тодруулсан байна. Энэхүү өвөрмөц наадгайг “Фингерхакельн” буюу хуруун барилдаан гэх бөгөөд жил бүр нутаг, нутгийн хүчирхэг эрс цугларч хэн нь хүчтэйгээ үздэг байна. Тэмцээний үеэр хурууны үе мултрах, шөрмөс сунах зэрэг бэртэл авдаг ч оролцогчид болон үзэгчид нэгэн өдрийг шар айраг ууж, хөгжилтэй, дуу хууртай өнгөрөөдөг уламжлалтай аж.

Бавари мужийн Бернбюүрен гэх жижигхэн тосгонд хурууныхаа бяр чадлыг үзэх гэсэн 150 залуу нэгэн том шар айрагны асарт цугларч, тэднийг үзэж сонирхохоор 1,000 гаруй хүн цугласан байна. Үе бүр дээр хоёр тамирчин газарт хөдөлгөөнгүй бэхэлсэн ширээний тал, талд сууж, суран гогцоог нэг, нэг хуруугаараа татаж, хэн нь дийлэхээ үздэг журамтай. Гэхдээ тамирчид гол төлөв дунд хуруугаараа татаж, хүчээ үздэг гэнэ. Зүйрлэвэл олс татах тэмцээнтэй ойролцоо гэж болох юм.

Тэмцээний нэг үе хэдхэн секундэд үргэлжлэх бөгөөд ялагчид дараагийн үед дэвшиж, хоорондоо үзэлцдэг. Энэ жилийн тэмцээний хамгийн залуу тамирчин 15 настай бол хамгийн ахмад нь 70 настай байжээ. Энэхүү хуруун барилдаан гэгч нь Германы Альп орчмын нутаг, хөрш Австри улсад тархсан бөгөөд анх ард иргэдийн элдэв маргаан зөрчилдөөнийг шийдэхдээ ашигладаг байснаас үүссэн уламжлалт спорт юм.