Владимир Путины ойрын хүрээллийн хүн гэгдэх Сергей Шойгу Батлан хамгаалахын сайдын албан тушаалаасаа 12 жилийн дараа огцрох гэж байна. ОХУ-ын Ерөнхийлөгч түүний оронд Ерөнхий сайдын нэгдүгээр орлогчоор ажиллаж байсан Андрей Белоусовыг нэр дэвшүүлжээ. Харин Сергей Шойгуг Үндэсний аюулгүйн зөвлөлийн даргын албан тушаалд сэлгэн томилохоор болсон байна. Нэр дэвшүүлсэн Андрей Белоусов нь цэргийн ямар нэгэн цолгүй, батлан хамгаалах салбараас өөр салбарт ажиллаж байсан юм. Тэрбээр өмнө нь Эдийн засгийн хөгжлийн сайд, ОХУ-ын Ерөнхийлөгчийн эдийн засгийн асуудал эрхэлсэн зөвлөх зэрэг албан тушаал хашиж байсан нэгэн билээ.

Хэдийгээр Батлан хамгаалахын сайд өөрчлөгдөж байгаа ч ОХУ-ын Батлан хамгаалах үзэл баримтлалын хүрээнд одоогийн координатын системд өөрчлөлт орохгүй гэж Кремлийн хэвлэлийн төлөөлөгч Дмитрий Песков онцолжээ.