Цагдаагийн байгууллагаас “Ачит Ихт” ХХК-тай холбоотой хэргийн мөрдөн шалгах ажиллагааны явцын талаар мэдээлэл хүргэх үеэр Монгол Улсын Ерөнхийлөгч асан Ц.Элбэгдоржийг яллагдагчаар татах санал хүргүүлсэн тухай мэдээллээ.

Эрүүгийн цагдаагийн албаны Эдийн засгийн гэмт хэрэгтэй тэмцэх газрын дарга, хурандаа Б.Ганчулуун хэлэхдээ “Ачит Ихт”Тус компани хоёр компанитай гэрээ байгуулж, 2014-2023 оны хооронд нийт 94,897 тонн катодын зэсийг тухайн үеийн ханшаар 1.6 их наяд төгрөгөөр худалдан борлуулсан урьдчилсан нөхцөл байдал тогтоогдсон. Ерөнхийлөгч асан Ц.Элбэгдоржийг яллагдагчаар татах санал хүргүүлсэн” гэсэн юм.

"Эрдэнэт үйлдвэр" ТӨҮГ нь “Ачит Ихт” компанитай балансын бус хүдрийг ашигласны төлбөрт тус компанийн 34%-ийг эзэмшихээр гэрээг 2013 оны долоодугаар сарын 17-нд байгуулсан байдаг. Улмаар 2015 оны зургаадугаар сарын 26-нд дээрх гэрээнд өөрчлөлт орж, “Ачит Ихт” компанид "Эрдэнэт үйлдвэр" ТӨҮГ-ын 34%-ийг бүрэн шилжүүлжээ. Үүнээс гурван жилийн дараа Үндэсний аудитын газраас “Эрдэнэт үйлдвэр” ТӨҮГ-т аудитын шалгалт хийж, “Ачит Ихт” ХХК-тай хууль зөрчин гэрээ байгуулсан гэж дүгнэсэн байдаг юм.