Өөрийгөө БЗС-ын зээлийн булхайг шүгэлдсэн гэж ярьдаг О.Батнайрамдал Боловсролын сайд асан, АН-ын дарга Лу.Гантөмөрийг улс орныг хохиролгүй болго хэмээн прокурорт гомдол гаргаснаар УИХ-ын сонгуульд горилогчдын дахиад нэг зодоон эхэллээ. Лу.Гантөмөрийг хүүхдэдээ Боловсролын сангаас зээл авч өгсөн, тэрийгээ төлөхгүй “мурисан”. Улсаас түүнтэй хариуцлага тооцож чадахгүй бол ард түмний гэсгээлийг амсуулна гэх ухааны юм ярьж явна, тэр. Яаж гэвэл О.Батнайрамдал өөрийн биеэр Лу.Гантөмөрийн тойргийг довтолж, сонгогчдын ихэнх саналыг өөрөө хуу хамж, БЗС-ийн хулгайчийг нульж хаях юм байх. Хэлсэн үгнийх нь ерөнхий санаа энэ. Их л муухай занаж дээ! Мэдээж хэрэг Лу.Гантөмөр ч чимээгүй суусангүй. Хариу барьж, МАН-ын генсек байсан О.Батнайрамдалыг буу гэхдээ нусаар тургидагтай нь зүйрлэж, хэн ч танихгүй “мангар бацаан” гэж цоллов. 

О.Батнайрамдал бас БЗС-гаас зээл өгөөгүйн улмаас Харвардад явж чадсангүй гээд л уйлан дуулан явсан. Энэ уйлан дуулан гэдэг үгийг түүнд зуугдсан Лу.Гантөмөр хэлсэн юм л даа. Гэтэл одоогийн Боловсролын сайд Л.Энх-Амгалан мэдээлэл хийхдээ О.Батнайрамдалд зээл олгох тушаал нь гарчихсан. Ёстой л нөгөө “Баяраа өөрөө ширээн дээрээс унасан юм билээ” гэдэг шиг О.Батнайрамдал гуай өгсөн зээлийг нь өөрөө ашиглаагүй л юм шиг байна билээ. Сонгууль дөхсөн энэ цагт улс төрийн олон жонхуу хутгалдаж, баахан зодоон нүдээн, хэрүүл уруул цуварч байна даа. Хөгийн ч юм дөө! Лу.Гантөмөрийн хэлсэнчлэн “нусан буу” маань “гарчих” гээд л пиараа хийж яваа нь энэ юм байлгүй. Аан, тийм! БЗС-ийн зээлийн тухай шүглийг хамгийн анх Л.Энх-Амгалан сайд өөрөө үлээсэн юм биш үү!