Цахим хөгжил, инновац, харилцаа холбооны яам цахим орчинд хүүхдийг хамгаалах зорилго бүхий “Цахим орчинд хүүхдийг хориотой болон хортой агуулгаас урьдчилан сэргийлэх, хамгаалах журам” баталжээ. Уг журамд боловсролын байгууллага, багш нар хүүхэд, эцэг эрхтэй харилцахдаа аюулгүй платформ ашиглах, Фейсбүүк зэрэг нийгмийн сүлжээ ашиглан гэрийн даалгавар, сургалттай холбоотой бусад мэдээлэлд ашиглахгүй байхыг зөвлөсөн байна.

Түүнчлэн цахим орчинд хүүхдийг хориотой болон хүүхдэд хортой агуулгаас хамгаалж, сургуулийн болон дотуур байрны орчинд ашиглаж буй интернэтийг 18+ контентын шүүлтүүртэй байхаар интернэтийн үйлчилгээ эрхлэгчидтэй гэрээ байгуулж, хэрэгжилтэд хяналт тавих юм байна. Интернэтийн үйлчилгээ үзүүлэгч нь тухайн айл өрхөд үйлчилгээ үзүүлэхдээ хүүхэдтэй эсэхийг тодруулах, хүүхэдтэй тохиолдолд 18+ контентын шүүлтүүртэй байх тохиргоог идэвхжүүлэх заавал зөвлөмжөөр хангах тухай уг журамд тусгажээ.

Ташрамд сануулахад сүүлийн таван жилд цахим орчинд үйлдэгдсэн 40,900 гэмт хэргийн улмаас 459 хүүхэд хохирогч болсон гэх судалгаа бий.