Рио Тинто компанийн нэгдүгээр улирлын тайлан мэдээлэлд дурдсанаар 2025 оны эхний улиралд 70.7 сая тонн төмрийн хүдэр нийлүүлсэн дүнтэй байна. Энэ нь сүүлийн зургаан жилд байгаагүй тааруу үзүүлэлт аж. Ялангуяа төмрийн хүдрийн гол уурхай болох “Пилбара”-д хэд, хэдэн удаа хүчтэй салхи шуурсан нь компанийн үйл ажиллагаанд сөргөөр нөлөөлжээ. Тийм ч учраас компанийн зүгээс үүссэн нөхцөл байдалтай уялдуулан “Пилбара” уурхайн үйл ажиллагааг сэргээх төсөлд 95 сая ам.доллар тусгасан юм.

Хэдийгээр компанийн нийлүүлэлт буурсан ч 2025 оны төсөөллөө хэвээр үлдээсэн байна. Тус компани энэ онд 323-338 сая тонн төмрийн хүдэр нийлүүлэх төлөвлөгөөтэй байгаа юм.

“Рио Тинто” компанийн нэгдүгээр улирлын тайлан мэдээний дараа Австралийн хөрөнгийн биржид хувьцаа нь 1.2% буурч, 110.1 австрали долларт хүрчээ.