Америк, Британийн эрдэмтдийн хамтарсан баг амьдрал байх өндөр магадлалтай гараг илрүүлснээ зарлалаа. Манай нарны аймгаас 124 жилийн зайд орших уг гараг нь Арслангийн ордод хамаарах бөгөөд эрдэмтэд “К2-18b” гэж нэрлэсэн уг гарагаас амьдрал үүсэхэд хамгийн чухал хоёр элементийг илрүүлжээ. Жеймс Уебб дуран авайгаас авсан зургийг шинжлэн үзэхээд диметил сульфид, диметил дисульфид гэх химийн хоёр химийн элемент байх магадлалтай хэд, хэдэн байршлыг олж харсан байна. Дэлхий дээр амьдрал үүсэхэд чухал үүрэг гүйцэтгэсэн энэхүү хоёр элемент нь ихэвчлэн фитопланктон буюу далайн замагаас үүсдэг юм. Ирүүлсэн зургийг харахад фитопланктонтой төстэй дүр зураг ажиглагдсан байна.

Дэлхийгээс найм дахин их масстай, 2.5 дахин том энэ гараг нь тэнхлэгийн эргэлт, хэлбэр зэргээрээ дэлхийтэй тун төстэй агаад амьдралын чухал бүрэлдэхүүн болох ус агуулж байх магадлал маш өндөр. Одоогоос хоёр жилийн өмнө 2023 онд “Жеймс Уебб” дуран авай анх үүнийг илрүүлж, агаар мандалд нь нүүрстөрөгчийн давхар исэл агуулагдаж байгааг тогтоон амьдрал байх магадлалтай гэж тооцож эхэлсэн юм.

Гэвч бусад эрдэмтэд үүнд ихээхэн болгоомжтой хандахыг анхааруулсаар байна. Харвард зэрэг томоохон их сургуулийн эрдэмтдийн үзэж байгаагаар “Жеймс Уебб” дуран авайнд фитопланктон шиг дүр зураг ажиглагдаж болох ч энэ нь амьдрал байгаа гэсэн үг биш аж. Учир нь үүнтэй төстэй гарагийг хэд, хэдэн удаа илрүүлж, фитопланктоны шинж чанар бий гэж үзэж байсан ч ихэнх нь нарийвчилсан судалгааны явцад биш болох нь нотлогджээ. Тиймээс цаашид судалгааны ажлыг өргөжүүлэхийг онцоллоо.