Өгөөдэй хааны зургаа дахь хатан Дөргөнэ хатны үеийн Их Монгол улсын тухай базаахгүй түүхийг харуулсан “Jaadugar: A Witch’s Life in Mongol” /Жаадугар: Монголын шулам/ нэрт манга цуврал анимэ болж үзэгчдэд хүрэхээр болжээ. Уг цуврал анимэгийн эхний улирал тавдугаар сарын 27-ны өдөр үзэгчдэд хүрэх аж.

Анх энэхүү манганы үндсэн зохиол, агуулгыг “Акитэ Шотен” хэвлэлийн газар 2021 оны есдүгээр сараас хөгжүүлж эхэлжээ. Улмаар 2022 оны наймдугаар сарын 16-ны өдөр хэвлэлтэд гарч байв. Одоог хүртэл нийт таван цуврал манга уншигчдад хэдийнээ хүрээд байна.

Энэхүү манга 1221 онд Толуйгаар удирдуулсан Их Монгол улсын цэрэг Хорасаны Тус хотыг уулгалан довтолж байгаагаар эхэлнэ. Манганы гол дүр болох Фатима нэрт охины гэр бүлийг хороож, улмаар Толуйн цэрэгт олзлогдон боол болж буйгаар зохиол өрнөнө. Түүнийг хааны ордонд боол болгосон бөгөөд Фатима өшөө хорслоо тайлахаар хичээх бөгөөд тухайн үед хааны ордонд нэр хүндтэй болоод байсан Дөргөнэ хатантай хавсарч байгаагаар дүрсэлжээ. Дөргөнэ хатан нь Өгөөдэй хааны зургаа дахь хатан. Өгөөдэй хааныг насан эцэслэхэд ордны эрх мэдлийг өөртөө авч 1241-1246 он хүртэл Их Монгол Улсын төрийг барьж байсан тухай сурвалжид тэмдэглэн үлдээсэн байдаг.

Товчхондоо өшөө хорсолтой Фатима хэрхэн Дөргөнэ хатныг эрхшээлдээ оруулж, үймээн самуунд автуулж байгааг дүрсэлсэн манга юм. Японд уг манга нь 2023, 2024 онд эмэгтэй уншигчдын чансаагаар 11-рт жагсаж, “Манга Тайшо” наадамд хоёр ч удаа нэр дэвшиж байжээ.