“Харри Поттер” цувралын Волдемортын дүрд тоглосон Британийн нэрт жүжигчин Ральф Файнс Парисын дуурийн шинэ улиралд дуурь найруулахаар болжээ. Тэрээр Оросын хөгжмийн суут зохиолч П.И.Чайковскийн “Евгений Онегин” дуурийг найруулах юм байна. Түүний найруулсан шинэ дуурь 2026 оны нэгдүгээр сарын 26-наас хоёрдугаар сарын 27-ныг хүртэл Парисын Гарниерийн ордонд тайзнаа тавигдах юм.

Ральф Файнс “Евгений Онегин” дуурийг найруулж байгаа нь санамсаргүй явдал огт биш. Учир нь 1999 онд түүний төрсөн эгч Марта Файнс энэхүү дуурийг кино болгож “Онегин” нэрээр найруулахад гол дүр буюу Евгени Онегины дүрд Ральф Файнс тоглож байсан юм. Түүгээр ч зогсохгүй 2018 онд дэлгэцнээ гарсан “Цагаан хэрээ” нэрт дэлгэцийн бүтээлд Александр Пушкины дүрийг бүтээж байхдаа сонгодог урлагт татагджээ.

Ральф Файнс хэлэхдээ “Оросын сонгодог бүтээлүүдэд хувь хүн дотоод ертөнцтэй, цаашлаад нийгэмтэй зөрчилдөж байгааг гайхалтай дүрсэлсэн байдаг. Үүн дээр л анхаарна” гэж нэгэн подкастад оролцохдоо ярьжээ.

Гарниерийн дуурийн театр 2025-2026 оны уран бүтээлийн жилд “Евгени Онегин” дууриас гадна, Вердигийн “Аида”, Вагнерийн “Ди Уолкюр”, “Зигфрид” зэрэг сонгодог бүтээлийг тайзнаа тавихаар төлөвлөсөн байна.