Рио Тинто компанийн тайланд дурдсанаар өнгөрсөн онд дэлхий даяар нийт 6.3 тэрбум ам.долларыг татвар, АМНАТ-т төлсний 482 сая ам.долларыг Монгол Улсад төлсөн тухай мэдээлжээ. Компанийн үндсэн үйл ажиллагаа явуулдаг Австрали улсад татвар, АМНАТ-өөс гадна аж ахуйн нэгжийн орлогын албан татварт 3.7 тэрбум ам.долларыг төлсөн бол, Чили улсад 615 сая ам.доллар, Канад улсад 500 сая ам.доллар, АНУ-д 136 сая ам.долларыг татвар хэлбэрээр төлсөн байна.

Энэ талаар “Рио Тинто” компанийн Санхүү эрхэлсэн захирал Питер Каннингем хэлэхдээ “Бид ажиллаж буй газар бүртээ хариуцлагатай байхыг эрмэлздэг. Бидний төлсөн татвараар бүс нутгийн эдийг засаг, нийгмийн хөгжилд чухал хувь нэмэр оруулж байгаа гэдэгт итгэлтэй байна” гэжээ.

Рио Тинто компанийн хувьд “Оюу Толгой” төсөл хэрэгжүүлдэг бөгөөд 2030 он гэхэд дэлхийн дөрөв дэх том уурхай болж, жилд 500 мянган тонн зэс үйлдвэрлэхээр тооцоолоод байна. Компанийн тайланд дурдсанаар “Оюу Толгой” төслийн ажилллах хүчнийг 97%, бараа материал, үйлчилгээний худалдан авалтын 71% Монголын ханган нийлүүлэгчдээс авч байгааг тодотгожээ.
“Рио Тинто” компани өнгөрсөн 10 жилд үйл ажиллагаа явуулж буй дэлхийн газар орон бүрд 773 тэрбум ам.долларын татвар, АМНАТ төлсний 78 орчим хувийг дан ганц Австрали улсад төлөөд байна.