Монгол Улс он гарснаас хойш эхний хоёр сарын байдлаар 608.2 мянган баррель түүхий нефть болон газрын тос экспортолжээ. Экспортолсон нийт дүн нь 46 сая ам.доллароор хэмжигдэж байна. Энэ нь өмнөх оны мөн үетэй харьцуулахад 15.4% буурсан гэсэн үг юм.

Дээрх хугацаанд эсрэгээрээ 499 мянган тонн нефтийн бүтээгдэхүүнийг 392.2 сая ам.доллароор импортолжээ. Импортын тухайд өнгөрсөн оны мөн үеэс долоон хувиар өсөөд байна.

Монгол Улс 2017 онд анхлан Газрын тос боловсруулах үйлдвэрийн шав тавьж байв. Энэ үйлдвэр ашиглалтад орсноор дотоодын шатахууны хэрэглээний 55%-г хангана гэж тооцоолж буй. Шав тавьснаас хойш найман жилийн хугацаанд төслийн гүйцэтгэл дөнгөж 20% байна. Төсөлд нэмэлтээр шаардлагатай 700 сая ам.долларын санхүүжилтийг Энэтхэгийн “Эксим” банкнаас авахаар шийдвэрлэсэн бөгөөд төслийн нийт өртөг 1.7 тэрбум ам.долларт хүрээд байгаа юм.