Буддын шашны оюун санааны удирдагч 14-р Далай лам өөрийн шинэ дурдатгалдаа хойд дүр нь Хятадын нутгаас гадна тодорно гэж мэдэгджээ. Энэ нь Далай ламын хувьд шинэ бус мэдэгдэл. Одоогоос зургаан жилийн өмнөөс Хятадын нутгаас гадна, бүр эмэгтэй хүн ч төрж мэднэ гэж мэдэгдсэн нь Хятадын дургүйцлийг төрүүлсэн юм. Гэвч түүний шинэ дурдатгалд нэг шинэ зүйл байсан нь “Хятадын нутгаас гадуурх чөлөөт ертөнцөд хойд дүр тодорно” гэж тодотгосон нь байлаа.

Буддын шашны оюун санааны удирдагч 14-р Далай лам Данзанжамц 1959 онд Маогийн коммунист засгийн эсрэг бослого бүтэлгүйтсэний дараа 23 насандаа олон мянган түвдүүдийн хамт Энэтхэг рүү дүрвэн дутаасан юм.

Өнгөрсөн жилүүдэд БНХАУ-ын засаг захиргаа Далай ламын хойд дүр Хятадын нутгаас тодорно гэж мэдэгдэж байсан ч үүнийг нь 14-р Далай лам илтэд эсэргүүцсээр өнөөг хүрсэн билээ. Өнгөрсөн сард БНХАУ-ын удирдлагууд 14-р Далай ламыг “Зөв замдаа эргэн орж, төв Засгийн газрын бодлогыг хэзээ нэг цагт дэмжинэ” гэж мэдэгдэж байв.

Өнгөрсөн хугацаанд шашны олон зуун зүтгэлтнүүд Далай ламын хойд дүрийг тодруулахтай холбоотой саналыг 14-р Далай ламд тавьж, захидал ирүүлсэн тухай дурдатгалдаа дурджээ. 14-р Далай лам Данзанжамц ирэх долоодугаар сард 90 насны сүүдэр зооглох бөгөөд энэ үеэр хойд дүртэй холбоотой албан ёсны дэлгэрэнгүй айлтгал тавихаар төлөвлөсөн байна.