Боловсролын яам 2025-2026 оны хичээлийн жилийн бүтэц, сурагчдын амралтын хуваарьт өөрчлөлт оруулж, өвлийн амралтыг нэг долоо хоногоор сунгахаар болжээ. Энэ тухай Боловсролын сайд П.Наранбаяр хэлэхдээ “Ирэх жилийн жил гурван улирлын бүтэцтэй байна. Гэхдээ амралтыг нэг долоо хоногоор сунгаж байгаа. Өөрөөр хэлбэл 12-р сарын 15-наас бага анги амарна. Ингээд 2026 оны нэгдүгээр сарын 26-ны даваа гарагт хичээл эхэлнэ. Зургаан долоо хоног буюу нэг сар гаруй амарна” гэсэн юм.

Харин дунд ангийнхан 12-р сарын 22-ны даваа гарагаас эхлэн таван долоо хоног, ахлах ангийнхан дунд ангийнхантай зэрэг амрах ч эхний долоо хоног нь цахим хичээл байхаар тусгажээ. Нэгэнт өвлийн амралт нэг долоо хоногоор сунаж байгаа тул зургаадугаар сар буюу хичээлийн жилийн төгсгөлд нэг долоо хоногоор сунаж хичээллэхээр болж байна. Сунасан долоо хоног нь шалгалт явуулах зохицуулалт хийсэн тухай салбарын сайд нь онцолж байлаа.

Ташрамд сануулахад Монгол Улсын Засгийн газар “Аз жаргалтай нэгдүгээр сар” иж бүрэн бодлого зарлахаар болсон байна. Үүнтэй холбогдуулан сурагчдын амралтын хуваарьт зохицуулалт хийхээр болсон нь энэ аж.