Уул уурхайн томоохон компанийн нэг “Рио Тинто” компани 2024 онд 10.9 тэрбум ам.долларын ашигтай ажилласан нь 2023 онтой харьцуулахад 7.6% буурсан үзүүлэлт боллоо. Ашиг буурсан гол шалтгаан нь хамгийн том худалдан авагч болох БНХАУ-ын эрэлт тааруу байсантай холбоотой юм байна.

Хэдийгээр компанийн ашиг буурсан ч тус компанийн зэсийн салбарын ашиг өмнөх оноосоо бараг 70 гаруй хувиар өссөн байна. Тус компани 2024 онд 670 мянган тонн зэс үйлдвэрлэж, 2023 оныхоос 13% өссөн үзүүлэлттэй байна. Зэсийн салбарын ашиг өсөхөд “Оюутолгой”-н гүний уурхайн гарц жил бүр нэмэгдэж байгаа, Эскондида уурхайн олборлолт нэмэгдсэн нь голлон нөлөөлжээ. “Рио Тинто” компани 2025 онд зэсийн гарцаа 780-850 мянган тоннд барих төлөвтэй байгаа бөгөөд 2030 он гэхэд жилд нэг сая тонн зэс нийлүүлэх зорилт тавиад байгаа билээ.