Малайзын холбооны шүүхийн лхагва гарагийн хуралдаанаар Ш.Алтантуяа агсны гэр бүлд 4.7 сая ринггит буюу 1.1 сая ам.долларын нөхөн төлбөр олгохоор шийдвэрлэлээ. Шүүхийн шийдвэрт дурдсанаар Ш.Алтантуяа агсны гэр бүлийн өмгөөлөгчийн дансанд нэр даруй байршуулахыг үүрэг болгожээ.

Бүр тодруулбал Засгийн газрын гаргасан давж заалдах гомдлыг тавдугаар сарын 19-ний өдөр хэлэлцээд хэрэв хүлээн авахгүй бол дээрх шийдвэр эцэслэгдэх аж. Түүнчлэн Малайзын Ерөнхий сайд асан Нажиб Разакийн зөвлөхөөр ажиллаж байсан Абдул Разак Багиндаг мөн адил 1.1 сая ам.доллар төлөх ёстой гэж үзжээ.

Одоогоос 19 жилийн өмнө 2006 онд Ш.Алтантуяагийн амгийг хөнөөсөн хэрэгт тус улсын Засгийн газар, Абдул Разак Багинда болон тусгай албаны хоёр цагдаад хариуцлага хүлээлгэх тухай шүүхийн шийдвэр 2022 онд гарч байсан билээ. Шүүхийн шийдвэр гарснаас хойш хэрэгт холбогдсон талууд хохирлыг төлж барагдуулаагүй тул хохирогчийн гэр бүл дахин шүүхэд хандсан юм. Чухамдаа 2022 оны шүүхийн шийдвэрийг эсэргүүцэн Малайзын Засгийн газар болон хэрэгт холбогдогч Абдул Разак Багинда нар давж заалдаад байгаа билээ.

Хэргийн тухай дахин сануулахад. Гэрчийн мэдүүлэгт дурдсанаар Ш.Алтантуяа нь Абдул Разактай харилцаатай байсан бөгөөд 2002 онд Малайзын Засгийн газар Францын төрийн өмчит компаниас шумбагч хөлөг худалдан авах хэлэлцээрт орчуулагчаар ажиллаж байжээ. Тухайн үеийн Батлан хамгаалахын сайд байсан Нажиб Разак байсан бөгөөд наймааны зуучлагчаар Абдул Разак оролцсон байна. Одоогоор энэхүү наймаа нь авлигын шинж чанар агуулсан эсэхийг тогтоохоор Малайз, Францын хамтарсан ажилын хэсэг ажиллаж байгаа юм.

Наймаанаас дөрвөн жилийн дараа 2006 оны аравдугаар сард Ш.Алтантуяагийн цогцсыг Куала Лумпурын ойролцоох нэгэн ойгоос олж байв. Хэргийн газрын үзлэгээр түүнийг буудан хөнөөж, ул мөрийг далдлахын тулд тэсрэх бөмбөгөөр дэлбэлсэн нь тогтоогдсон билээ. Аллагыг үйлдсэн гэх цагдаагийн алба хаагч Азила Хадри, Сирул Азхар нарт цаазын ял оноосон юм. Азила Хадри мэдүүлэгтээ захиалагч нь Нажиб Разак байсан тухай дурдаж байв.