Австралийн эдийн засгаар дагнан бичдэг Australian Financial Review сэтгүүл Рио Тинто компани Монгол Улсын Засгийн газарт татварын маргаанаа 295 сая ам.доллароор шийдвэрлэх санал тавьсан тухай мэдээллээ. Тус сэтгүүлд  “Рио Тинто” компанийн Зэсийн группийн захирал Кети Жексон өнгөрсөн оны 12-р сард Монгол Улсын Аж үйлдвэр, эрдэс баялгийн сайд Ц.Туваанд захидал бичиж, 2013-2020 он хүртэлэх хугацаанд үүссэн татварын нэхэмжлэлийг хугацаа алдалгүй хийх санал тавьсан байна. Тэдний санал болгож байгаагаар Монгол Улсаас нэхэмжилсэн 814 тэрбум төгрөгийн татварын актын нэхэмжлэлийг буцаах санал тавьжээ. Санал болгосон 295 сая ам.долларын 285 сая нь одоо үргэлжилж буй татварын маргааны процесстой холбогдох бол үлдэж буй 10 сая ам.доллар нь шийдэгдээгүй бусад зардалд зарцуулагдах юм байна.

“Рио Тинто” компанийн Зэсийн группийн захирал Кети Жексон захидалдаа “Монгол Улсын Засгийн газартай үүссэн асуудлыг харилцан ойлголцлын замаар шийдвэрлэх, цаашид татварын аливаа маргаанаас сэрэмжлэхийн тулд иж бүрэн тохиролцоонд хүрэх саналтай байна” гэжээ.

Австралийн AFR агентлагт мэдээлснээр “Рио Тинто”-гийн хэвлэлийн төлөөлөгч хэлэхдээ “Монгол Улсын Засгийн газартай тохиролцоонд хүрэхийн тулд идэвхтэй ажиллаж байна. Хэлэлцээ үргэлжилж байгаа тул одоогоор мэдээлэл өгөх боломжгүй” гэсэн байна.

Рио Тинто компани зэсийн үйлдвэрлэлийн гарцаа 2026 онд 16 хувиар, 2030 он гэхэд 40 хувиар нэмэгдүүлэхээр зорьж  буй. Энэ онд л гэхэд 850 мянган тонн хүртэл нэмэгдүүлэхээс зорьж байгаа юм. Энэхүү стратегийн гол хэсгийн нэг нь “Оюутолгой” төсөл. Уг төслийн олборлолтын хэмжээг 2030 он гхээд хоёр дахин нэмэгдүүлж, 500 мянган тоннд хүргэх хүлээлттэй байна.