Дэлхий даяар газар аваад байгаа романсын гэмт хэрэг буюу сошиал сүлжээгээр танилцаж, элдэв арга хэрэглэн эмэгтэйчүүдээс их хэмжээний мөнгө залилж, хохироодог хэргийн сонгодог жишээ саяхан тохиолджээ. Анна гэх 53 настай франц эмэгтэй Инстаграмаар Холливуудын алдарт жүжигчин Брэд Питттэй танилцан дотно харилцсаар дурлаж орхижээ. Гэтэл Брэд Питт хорт хавдар тусаж, эмчилгээний төлбөр төлөх шаардлагатай болсноо дуулгаснаар энэ үйл явдалын оргил үе эхэлсэн байна. Хохирогч эмэгтэйн тайлбарласнаар Брэд Питт эхнэр Анжелина Жолигоос салахаар шүүхдэж байгаа тул дансыг нь битүүмжилсэн. Иймд эмчилгээний төлбөрөө төлж чадахгүй болсон. Гэхдээ асуудал шүүхээр шийдвэрлэгдэж, данс нь нээгдсэний дараа буцааж өгөхөөр түр зээлье гэжээ. Мэдээж, Анна эхэндээ итгээгүй бөгөөд баталгаа болгож, зургаа явуулахыг шаардаж, хариуд нь Б.Питт түүнд эмнэлгийн орон дээр тусгай төхөөрөмж салгуулчихсан хэвтэж буй зургуудаа явуулснаар “тархийг нь эргүүлж” чаджээ. Брэд Питт өөрийгөө гэж итгүүлэхийн тулд Аннатай удаа дараа видео дуудлага хийж, үнэн байдлаа учирласан гэнэ. Нэгэнт хайртай болсон Анна бүсгүй хүнд өвчиндөө шаналж байгаа алдарт жүжигчинд хэд, хэдэн удаагийн гүйлгээгээр нийт 700,000 евро шилжүүлсэн байна. Харамсалтай нь, Брэд Питт нь хиймэл оюуны тусламжтайгаар бүтээсэн хуурамч зураг болохыг мэдсэн хойно Анна мөнгөө эргүүлж олж авахаас нэгэнт оройтсон байв. Хамгийн хачирхалтай нь Брэд Питт түүнд үнэтэй, тансаг зэрэглэлийн бэлэг илгээх гэсэн боловч гаалийн татвар нэрээр 9,000 евро шилжүүлсэн авсан байгаа юм. Мөнгө залилулаад ч зогсохгүй Анна шинэхэн хайрт Брэд Питтийнхээ гэрлэх амлалтанд итгэж, олон жил хамт амьдарсан нөхрөөсөө салжээ. Анна залилуулснаа мэдсэний дараа Францын ТФ1 сувагт өгсөн ярилцлагадаа “Анх Жейн Этта Питт гээд ээжийнхээ нэртэй хаягаар зурвас бичиж, орж ирэхэд нь даан ч жаахан эргэлзээд байсан юм” хэмээн тун харамсангуй ярьж байв.