АНУ-ын Калифорни мужийн Лос Анжелес хотын орчимд хээрийн түймэр гарч олон зуун байшин барилга шатаж, хэдэн арваар тоологдох хүн амиа алдаж, асар их хэмжээний хохирол учруулаад байгаа билээ. Гэтэл дайны хажуугаар дажин гэгчээр шатаж буй байшингаас хулгай хийдэг гэмт этгээдүүд гарч ирсэн талаар орон нутгийнхан мэдээлж байсан. Тэгвэл өчигдөр цагдаа нар эргүүл хийж яваад гал сөнөөгчийн хувцас өмссөн орон байрны хулгайчдын бүлгийг илрүүлэн баривчилжээ. Тодруулбал, цагдаа нар сэжиг бүхий гал сөнөөгчийг зогсоон шалгатал хулгайч болох нь тогтоогдсон бөгөөд төд удалгүй гал унтраах машинтай хамсаатнууд нь ч баригдсан байна. Орон нутгийн Шерифф Роберт Лунагийн мэдээлснээр түймэр гарснаас хойшх өнөөдрийг хүртэлх хугацаанд гал сөнөөгчийн хувцсаар өнгөлөн далдалж, айлын гэр ухаж явсан 29 хулгайчийг баривчлаад байгаа юм.