Монгол Улсын нүүрсний экспорт түүхэндээ анх удаагаа 80 сая тонн давлаа. Гаалийн ерөнхий газрын мэдээлэлд дурдсанаар 2024 онд экспортолсон нүүрсний хэмжээ 83.7 сая тоннд хүрчээ. Ингэснээр нүүрсний экспортын орлого 8.6 тэрбум ам.доллар болсон байна. Үүнийг өнгөрсөн онтой харьцуулбал 20 орчим хувиар өссөн үзүүлэлт юм.

Монгол Улс 2024 он дөнгөж гарахтай зэрэгцээд нүүрсний экспортын хэмжээг 60 сая тонноос доошгүй хэмжээнд хүргэх зорилт тавьсан ч гүйцэтгэл сайн байсан тул тонныг нь дунджаар 115 ам.доллароор тооцон 78 сая тонн болгож зорилтоо нэмээд байсан билээ.

Ашигт малтмалын гол нэрийн зургаан эрдэс бүтээгдэхүүний экспортын нийт дүн 13.2 тэрбум ам.долларт хүрч, өмнөх онтой харьцуулахад даруй таван хувиар өссөн байна.