Шинэ он гараад удаагүй байхад энэ оны байтугай ойрын хэдэн арваны гэж болохуйц эрдэнэсийн хулгайн хэргийн талаарх мэдээлэл тархлаа. Тодруулбал, өнгөрсөн оны арванхоёрдугаар сарын 07-нд Английн Лондон хотын Гэгээн Жонс Вүүд гудамжинд байрлах тансаг зэрэглэлийн харшид хулгай орсон байна. Уг харш нь Хонг Конгийн харьяат, тэрбумтан Шафира Хуангийн гэр бөгөөд нүүрээ амны хаалтаар халхалсан этгээд шөнийн цагаар гэрт нь орж, их хэмжээний үнэт эдлэл, дизайнерийн цүнх хулгайлжээ. Хатагтай Хуангийн гэр бүлийн төлөөлөгч Шаба Вирагийн мэдээлснээр нийт 10 сая фунт стерлингийн үнэ бүхий зүйлс алдсан гэнэ. Тиймээс муур шиг сэмхэн хөдөлгөөнтэй “эрдэнэсийн хулгайч”-ийн талаар үнэн бодитой мэдээлэл өгсөн хүнийг 1.5 сая фунт стерлингээр шагнахаа амлав.