Одон орончид тун гайхмаар нээлт хийснээ дуулгаж байна. Манай гарагаас 12 тэрбум гэрлийн жилийн зайд дэлхийн бүх далай, тэнгисийн усыг нийлүүлснээс даруй 140 их наяд их хэмжээний ус задгай сансарт оршиж байгааг илрүүлсэн гэнэ. Энэ их ус нь манай нарнаас 20 тэрбум дахин их масстай квазар одыг тойрон эргэлдэхдээ манай нарнаас их наядыг мянга дахин үржүүлсэнтэй тэнцэх хэмжээний эрчим хүч ялгаруулдаг юм байна.

Өөр нэгэн сонирхолтой зүйл нь их хэмжээний ус тойрон эргэлдэж байдаг APM 08279+5255 хэмээн нэрлэсэн квазар од нь Их тэсрэлтийн дөнгөж дараах үеийн гэрлийг агуулж буйгаараа онцлогтой бөгөөд манай ертөнцийн эхэн үеийн түүх рүү өнгийж харах боломжтой гэнэ.

Судалгааны ажилд оролцсон НАСА-гийн эрдэмтэн Мэтт Брэдфорд нэн шинэ нээлтийн ач холбогдлыг онцлохдоо “Квазарыг тойрсон орчин асар их хэмжээний ус ялгаруулдаг нь тун хачирхалтай. Энэ нь ус бол манай ертөнцийг анх үүсэхэд ч байсныг батлах хамгийн том нотолгоо юм” гэжээ. APM 08279+5255 квазар болон түүний төвд орших хар нүх нь эргэн тойрныхоо хий, тоосыг залгиж, асар их хэмжээний халуун ялгаруулдаг учир эрдэмтэд анх удаа асар хол зайд усны молекул илрүүлснээ ч бас онцолж байна.