Монгол Улс он гарснаас хойш эхний 11 сарын байдлаар 74.2 сая тонн нүүрс экспортолсон тухай Гаалийн ерөнхий газрын мэдээлэлд дурджээ. Үүнийг өмнөх оны мөн үетэй харьцуулахад даруй 24 хувиар өссөн гэсэн үг юм. Ингэснээр Засгийн газрын тогтоосон 78 сая тонн нүүрс экспортлох зорилт биелэхэд тун дөхөөд байна. Монгол Улс 2024 он дөнгөж гарахтай зэрэгцээд нүүрсний экспортын хэмжээг 60 сая тонноос доошгүй хэмжээнд хүргэх зорилт тавьсан ч гүйцэтгэл сайн байсан тул 78 сая тонн болгож зорилтоо нэмээд байсан билээ.

Манай улсын хувьд 2023 онд 66.7 сая тонн нүүрс экспортолж түүхэн дээд амжилт тогтоосон билээ. Монгол Улсын Засгийн газраас 2025 оны Улсын төсвийн төсөлд нүүрсний экспортын хэмжээг 80 сая тонноос доошгүй байхаар тусгасан юм.

Монгол Улсаас БНХАУ-д нүүрсний экспорт төмөр замын тээвэрлэлтийн хүчин чадал нэмэгдсэнээр ирэх гурван жилийн хугацаанд гурав дахин өснө гэж БНХАУ-ын үйлдвэрлэгчид тооцоолж байна. Түүнчлэн БНХАУ-ын коксжих нүүрсний нийт импортын 40%-г Монгол Улс бүрдүүлж буйг “SXCoal” цахим хуудас мэдээлсэн юм.