Их Британийн дуучин, Сер Элтон Жон өчигдөр Лондон хотноо “Прада өмсдөг чөтгөр” мюзиклийнхаа нээлтэнд оролцсон боловч үзэж чадсангүй. Учир нь, тэрбээр мюзиклийн дараа тайзан дээр гарч үг хэлэхдээ хоёр нүд нь хараагүй болсныг албан ёсоор мэдэгджээ. “Хэдийгээр би уран бүтээлээ үзэж чадаагүй ч гэлээ чихээрээ сонсож, сэтгэлээрээ мэдэрч гайхамшигтай таашаал авлаа” хэмээжээ.

Өдгөө 77 настай алдарт дуучин өнгөрсөн долоодугаар сард Францын өмнөд нутагт аялж яваад нүдэндээ бохир оруулснаас хараа нь огцом муудаж эхэлсэн юм. Хэдийгээр яаралтай эмчилгээ хийлгэсэн ч өрөөсөн нүд нь юм харахаа больж, зүүн нүдэндээ нөлөөлсөн талаар тэрбээр өнгөрсөн сард Инстаграм дахь хуудсаараа мэдэгдсэн юм. Гэхдээ ийн хараагүй болсон нь түр зуурын явдал бөгөөд эмчилгээ бүрэн хийж дууссаны дараа хоёр нүднийх нь хараа дахин сэргэж эхэлнэ гэж эмч нь тайлбарлажээ.