Украинийн Батлан хамгаалахын сайд Рустем Умеров бусад албаны төлөөлөгчдийн хамт БНСУ-д айлчилж, тус улсын Ерөнхийлөгч Юн Сук Ёлтой уулзсан байна. Уулзалтын үеэр Р.Умеров Умард Солонгосоос ОХУ-д дэмжлэг болгон илгээсэн 10,000 цэргийн аюул, заналтай холбогдуулан сөрөг арга хэмжээ авахыг уриалжээ. Харин Сөүл Украинд зэвсэг нийлүүлэх замаар сөрөг арга хэмжээ авах боломжтой гэдгээ дахин илэрхийлжээ. БНСУ нь өнгөрсөн аравдугаар сард энэ талаар мэдэгдэж байсан юм. Мөн энэ удаад Сөүл дэмжлэг үзүүлэх асуудлыг илүү нухацтай бодож үзнэ гэдгээ илэрхийллээ. Учир нь, АНУ-ын Ерөнхийлөгчийн сонгуульд Дональд Трамп ялсантай холбоотой гэж ажиглагчид тайлбарлав. Хэдийгээр дэмжлэг үзүүлэх талаар ярьсан нь нааштай мэдээ ч гэлээ БНСУ тун болгоомжтой хандаж байгааг тэд санууллаа.