АНУ-ын Гааль, хил хамгаалах газрынхан өчигдөр Калифорнийн Карсон хотод хэвлэлийн бага хурал хийж, хилээр нэвтрүүлэхийг завдах үед илрүүлсэн их хэмжээний дуураймал гитар хураан авсан талаар тайлагналаа. Лос Анжелесийн боомт хариуцсан захирал Африка Беллийн мэдээлснээр дэлхийд алдартай Гибсон брендийн гитарнуудыг дуурайлган үйлдвэрлэсэн 3,000 гаруй гитарыг гаалийн үзлэгээр илрүүлж, хураан авсан байна.

Дуураймал гитарны зарим нь рокын бурхад гэгддэг Дейв Гроль, Эйс Фрешли, Закк Вайльд арт зориулан гаргасан тусгай загварын гитарнуудыг жинхэнээс нь ялгарахын аргагүй хийсэн байжээ. Зарим гитэр дээр Слаш зэрэг алдартнуудын гарын үсгийг ч дуурайлган буулгасан байна. Гибсон брендийн гитар нь олон улсад нэр хүндтэй, чанартай, эдэлгээ сайн даадаг, мэргэжлийн хэмжээнд ажилладгаараа алдартай бөгөөд энгийн гитарнууд нь л 1,500-10,000 долларын үнэд хүрдэг бол 1959 онд Лес Полд зориулсан гэх мэт цөөн тоогоор үйлдвэрлэсэн хуучны гитарнууд нь хэдэн зуун мянган доллараар үнэлэгддэг юм. Тэгэхээр 3,000 дуурмайл гитарын зах зээлийн үнэлгээ нь 18 сая доллартай тэнцэхүйц юм байна.

Албаныхны мэдээлснээр дуураймал гитарыг ИБэй, Фейсбүүк тэргүүтэй олон нийтийн сүлжээг ашиглахаас гадна Гибсон брендтэй хамтран ажилладаг Гитар Центр зэрэг хөгжмийн сүлжээ дэлгүүрүүдээр  худалдаадаг нь тогтоогджээ. Гэхдээ тэд энэ хэргийн цаана байгаа сэжигтнүүд, дуураймал гитарыг хэзээ, хаана үйлдвэрлэсэн, хэзээнээс АНУ-ын хилээр нэвтрүүлж эхэлсэн талаар нарийвчлан тогтоохоор ажиллаж байгаа гэлээ.