Францын төрийн мэдлийн “Орано” компани Монгол Улсад хэрэгжүүлж буй олон тэрбум еврогийн өртөгтэй ураны төсөл 2030 он гэхэд цөмийн эрчим хүч үйлдвэрлэж эхлэх боломжтой гэж албан ёсны мэдэгдэлдээ дурджээ. Орано компанийн Монгол дахь суурин төлөөлөгч Оливье Томире хэлэхдээ “Зөөвч овоо уурхайн арилжааны бүтээгдэхүүн хөрөнгө оруулалтын гэрээнд гарын үсэг зурснаас хойш таван жилийн дараа эхлэх боломжтой. Энэ парламентын чуулганаар төслийг батлах хүлээлттэй байна” гэжээ.

Өнөөгийн байдлаар Хятад улсын дотоодын үйлдвэрлэл нэмэгдэж, Европ, Азийн бусад улсууд уламжлалт цахилгаан станцаас татгалзах хандлагатай байгаа энэ үед ураны эрэлт нэмэгдсээр байна. Өсөж буй энэ эрэлтийг харгалзан “Зөөвч овоо” төсөл нь Оюу толгойн бүтээн байгуулалтаас хойших хамгийн том уул уурхайн төсөл болох хүлээлттэй байгаа юм. Уг төслийн бүтээн байгуулалтын ажил 2013 оноос хойш “Орано”-гийн толгой компани болох “Арева” компани Монголын цөмийн “Мон-Атом” компанитай хамтран хэрэгжүүлж байсан билээ.