Дэлхийн эдийн засгийн чуулганаас эрчим хүчний шилжилтийн тайланг 14 дэх жилдээ гаргаж байна. Энэхүү тайланд дэлхийн 120 улс хамрагдахад Монгол Улс сүүлээсээ дөрөвт буюу 116-рт жагссан байна. Энэ нь өнгөрсөн оныхоос таван байр ухарсан үзүүлэлт болж байгаа билээ.

Монгол Улс газар зүйн байршлаас шалтгаалан 2600 гигаватт орчим сэргээгдэх эрчим хүчний нөөцтэй тул эрчим хүч үйлдвэрлэлээ нэмэгдүүлж, бүс нутгийн эрчим хүч хангамжийн сүлжээнд хувь нэмэр оруулах боломжтойг уг тайланд дурджээ. Уур амьсгалын өөрчлөлт, цөлжилттэй тэмцэхэд шинэ үеийн залуусын оролцоо чухал тул байгаль орчноо хамгаалах, сэргээгдэх эрчим хүчний талаарх ойлголтыг сургуулийн хөтөлбөрт багтах ёстой гэж дүгнэлт хэсэгт дурджээ.

Монгол Улс сүүлийн 70 орчим жилийн дэлхийн дунджаас бараг гурав дахин өндөр хэмжээр дулаарч байгаа төдийгүй уур амьсгалын өөрчлөлтөд хамгийн их өртөж байгааг НҮБ-ын хөгжлийн төлөв байдлын шинжилгээнд дурдсан билээ. Монго Улсын нүүрсхүчлийн хий дэлхийн дунджаас бараг 15 дахин өндөр, нэг хүнд ноогдох хүлэмжийн хийн ялгаруулалт 21 тонн байгааг мөнхүү тайланд дурдсан юм. Үүнд нөлөөлж буй хамгийн том хүчин зүйл нь газар ашиглалтын өөрчлөлт аж. Монгол Улсын нийт ялгаруулж буй хүлэмжийн хийн 44% нь газар ашиглалтаас үүдэлтэй байна. Тиймээс сэргээгдэх эрчим хүчний шилжилтэд төрийн бодлогоор чиглүүлэн нэн даруй шилжих ёстой гэдгийг мэргэжилтнүүд зөвлөж байгаа юм.