Сонгуулийн ерөнхий хорооны ээлжит хуралдаанаар УИХ-ын 2024 оны ээлжит сонгуульд нэр дэвшигчдийн материалыг хэлэлцээд 1336 нэр дэвшигчийг бүртгэсэн байна. УИХ-ын сонгуулийн тухай хуульд “Нэр дэвшигчээр бүртгэхээс татгалзсан тохиолдолд санал авах өдрөөс 25-аас доошгүй хоногийн өмнө зөрчлөө арилгасны үндсэн дээр дахин бүртгүүлэхээр шаардагдах баримт бичгийг сонгуулийн ерөнхий хороонд ирүүлж болох зохицуулалттай. Энэ дагуу 16 нам,  хоёр эвслээс 99 нэр дэвшигч, бие даан нэр дэвшигч гурав, нийт 102 хүн зөрчил арилгасан материалаа ирүүлжээ. Үүнээс 92 хүний баримт материал шаардлага хангаснаар нийт 1336 хүнийг бүртгэхээр болсон байна.

Харин нэр дэвшигчид тавигдах шаардлага хангаагүй, баримт бичиг дутуу 10 хүнийг нэр дэвшигчээр бүртгэхээс татгалзахаар шийдвэрлэжээ. Тухайлбал: баримт бичиг дутуу гурав, татварын өртэй гурав, өөр намын гишүүнчлэлтэй гурав, Төрийн жинхэнэ албан хаагч албан тушаалаас чөлөөлөгдөөгүй нэг хүнийг нэр дэвшигчээр бүртгэхээс татгалзжээ. Түүнчлэн иргэний гомдлын дагуу нягтлан шалгахад нэг нэр дэвшигч өөр намын гишүүнчлэлтэй нь тогтоогдсон тул Сонгуулийн тухай хуулийн заалтыг үндэслэн нэр дэвшигчээр бүртгэсэн шийдвэрийг хүчингүй болгосон байна.

Өмнөх хуралдаанаар нийт 1399 хүний баримт бичгийг нягтлан шалгаж хуульд заасан шаардлага хангаагүй, баримт бичиг дутуу зэрэг үндэслэлээр 154 хүнийг нэр дэвшигчээр бүртгэхээс татгалзсан юм. Энэ хурлаас хойш 104 хүн баримт бичгээ дахин ирүүлснээс хоёр иргэний асуудлыг хэлэлцэлгүй хасжээ.  

Сонгуулийн ерөнхий хорооны бүртгэлээс харахад Монгол ардын нам 126, Ардчилсан нам 126, Үндэсний эвсэл 66, Иргэний зориг ногоон нам 71, Шинэ нэгдсэн эвсэл 90, ХҮН нам 122, Иргэний хөдөлгөөний намын 124 хүнийг нэр дэвшигчээр бүртгэжээ. Харин бие даан нэр дэвших 42 хүнийг эцсийн байдлаар бүртгэсэн байна.

 Хууль заасны дагуу дээрх нэр дэвшигчдийг энэ сарын 10-ны өдөр олон нийтэд зарлах юм.