Пүрэв гарагт өндөрлөсөн бүгд хурлын төгсгөлд Хятадын Коммунист Нам (ХКН) авлигын эсрэг тэмцэгчийг эрх мэдлийн дээд хүрээлэлдээ элсүүлсэн тухай төрийн мэдээллийн хэрэгслүүд мэдээлжээ. "Тавдугаар бүгд хурал" гэгдэх уг хуралдааны төгсгөлд Жан Шэнминийг Төв Хорооны Улс төрийн товчооны гишүүнээр сонгосон талаар "Синьхуа" агентлаг мэдээлсэн байна. Армийн 68 настай генерал тэрбээр Хятадын Ардын Чөлөөлөх Армийг удирддаг, эрх мэдэл бүхий Төв Цэргийн Зөвлөлийн бүрэлдэхүүнд багтсан байдаг. Ердийн үед долоон гишүүнтэй байдаг энэхүү бүрэлдэхүүн нь ердөө хоёр гишүүнтэй Жан болон нам, төрийн тэргүүн Ши Жиньпин болж цөөрсөн.

Бусад генералууд, тэр дундаа Ши Жиньпиний олон жилийн холбоотон Жан Юушя хүртэл албан тушаалаасаа чөлөөлөгдсөн. Жан Хятадын арми дахь авлигын эсрэг тэмцэлд гол үүрэг гүйцэтгэсэн юм. Түүнийг томилохын зэрэгцээ бүгд хурал (пленум) цэргийн албан хаагчид болон намын албан тушаалтнуудад холбогдох шалгалтын тайлангуудыг баталж, тэднийг намаас хөөх шийдвэр гаргажээ. Мөн энэ нь ХКН-ын Олон улсын харилцааны хэлтсийн дарга асан, нэгэн цагт Гадаад хэргийн сайдын албан тушаалд нэр дэвшиж магадгүй хэмээн яригдаж байсан, одоогоор сураггүй алга болсон нэрт дипломатч Лю Жяньчаог намаас хөөсөн явдлыг анх удаа албан ёсоор баталгаажуулууд байна.

Түүнчлэн бүгд хуралдаанаар Хятадын шинэ удирдлагыг сонгох Намын XXI их хурлыг "2027 оны хоёрдугаар хагаст" зохион байгуулахаар шийдвэрлэжээ. Ажиглагчдын таамаглаж буйгаар, Ши Жиньпин Хятадын Коммунист Намын (ХКН) Ерөнхий нарийн бичгийн даргын албан тушаалд дөрөв дэх удаагаа улиран сонгогдохыг эрмэлзэх төлөвтэй байна. Бээжин хотноо даваа гарагаас эхлэн хатуу хамгаалалтын дор, хаалттай горимоор Тавдугаар бүгд хуралдаан болж өнгөрлөө. Ерөнхийдөө 300 гаруй гишүүнээс бүрддэг Төв хорооны бүрэлдэхүүнээс энэ удаад 162 үндсэн гишүүн, 117 орлогч гишүүн буюу цөөн тооны гишүүд л оролцсон байна. Хуралдааны гол сэдэв нь намын дотоод сахилга бат, авлигын эсрэг тэмцэл байв. Ши Жиньпиний удирдлага дор 100 сая гаруй гишүүнтэй ХКН-д олон жилийн турш авлигын эсрэг ширүүн тэмцэл өрнөж байгаа бөгөөд шинжээчдийн үзэж буйгаар Ши үүнийг өөрийг нь шүүмжлэгчдээс ангижрах хэрэгсэл болгон ашиглаж байгаа аж.

"Синьхуа" агентлагийн мэдээлснээр, тус бүгд хуралдаанаар авлигын эсрэг тэмцлийг тууштай үргэлжлүүлж, авлига үүсэх үндсэн шалтгааныг системтэй менежментийн аргаар шийдвэрлэх шаардлагатайг онцолжээ. Мөн бусад арга хэмжээнүүдийн зэрэгцээ нам болон төрийн хяналтын тогтолцоог сайжруулах саналыг дэвшүүлсэн байна.